ஏறாவூர் பட்ஜெட் ஏகமனதாக நிறைவேற்றம்

ஏ.எச்.ஏ. ஹுஸைன்

ஏறாவூர் நகர சபையின் தலைவரால் சமர்ப்பிக்கப்பட்ட 2022ஆம் ஆண்டுக்கான சுமார் 164 மில்லியன் ரூபாய்க்குரிய வரவு - செலவுத் திட்டம் (பட்ஜெட்) எவ்வித எதிர்ப்பின்றி, ஏகமனதாக நிறைவேற்றப்பட்டுள்ளதாக நகர சபைச் செயலாளர் எம்.ஆர் சியாஹுல்ஹக் தெரிவித்தார்.

அச்சபையின் விசேட சபைக் கூட்டமும் பாதீடு சமர்ப்பிப்பும், சபைத் தலைவர் எம்.எஸ். நழிம் தலைமையில், இன்று (15) நடைபெற்றது.

இது புதிய தலைவரின் இரண்டாவது பாதீடு சமர்ப்பித்தலாக அமைந்திருந்தது.

இக்கூட்டத்தில் ஏறாவூர் நகர சபையின் மொத்தமுள்ள அனைத்துக் கட்சி உறுப்பினர்கள் 17 பேரில் 14 பேர் கலந்துகொண்டிருந்தனர்.

ஏறாவூர் நகர சபையில் முஸ்லிம் தேசியக் கூட்டமைப்பு, ஐக்கிய தேசியக் கட்சி, ஸ்ரீ லங்கா சுதந்திரக் கட்சி, இலங்கை தமிழரசுக் கட்சி, ஐக்கிய சமாதானக் கூட்டமைப்பு, தமிழ் மக்கள் விடுதலைப் புலிகள் கட்சி மற்றும் சுயேட்சை குழு ஆகியவற்றின் உறுப்பினர்கள் முறையே 5, 4, 3, 2, 1, 1 மற்றும் 1 என்ற அடிப்படையில் ஆசனங்களைப் பெற்றுள்ளமை குறிப்பிடத்தக்கது.