தளவாய்க் கிராமத்தில் புதிய பாடசாலை

-ஏ.எச்.ஏ.ஹுஸைன்

மட்டக்களப்பு, தளவாய்க் கிராமத்தில் புதிய பாடசாலையொன்றை நிர்மாணிப்பதற்கு நடவடிக்கை எடுக்கப்பட்டுள்ள நிலையில், அதற்கான அடிக்கல் நாட்டும் நிகழ்வு ஞாயிற்றுக்கிழமை (28) நடைபெற்றது.

தளவாய் சுவாமி அஜராத்மானந்தாஜி வித்தியாலயம் எனப் பெயரிடப்பட்டுள்ள இப்பாடசாலையை நிர்மாணிப்பதற்கு கிழக்கு மாகாணசபை சுமார் 49 இலட்சம் ரூபாயை ஒதுக்கியுள்ளதாக மாகாண முதலமைச்சர் செய்னுலாப்தீன் நஸீர் அஹமட் தெரிவித்தார்.

கடந்த யுத்தம் காரணமாக இடம்பெயர்ந்த தளவாய்க் கிராம மக்கள், தற்போது அங்கு மீள்குடியேறியுள்ளனர். இக்கிராமத்தில் சுமார் 150 குடும்பங்கள் மீள்குடியேறியுள்ளன. இக்கிராமத்தில் பாடசாலை இல்லாததன் காரணமாக சுமார் 5 கிலோமீற்றர் தூரத்திலுள்ள பங்குடாவெளி, இலுப்படிச்சேனை, வேப்பவெட்டுவான் ஆகிய கிராமங்களிலுள்ள பாடசாலைகளுக்கு மாணவர்கள் பெரும்பாலும் கால்நடையாகச் செல்ல வேண்டியுள்ளது. மேலும், காட்டுவழியாகச் செல்லும்போது, மாணவர்கள் அதிக சிரமத்தை எதிர்கொள்ளவும் நேரிடுகின்றது.

இந்நிலையில், தளவாய்க் கிராமத்தில் தரம் ஒன்றுக்கான 4 வகுப்பறைகளும் அலுவலகமும் கொண்டதாக இப்பாடசாலை நிர்மாணிக்கப்படவுள்ளதாக இப்பாடசாலையின் புதிய அதிபர் தருமலிங்கம் இராசானந்தம் தெரிவித்தார்.

இப்பாடசாலைக்கான கட்டடவேலை அடுத்த 3 மாத காலப்பகுதிக்குள் முடிக்கப்படுமெனவும் அவர் கூறினார்.