ரணவிரு குடும்பங்களுக்கு ஏப்ரல் 10இல் வீடுகள் கையளிப்பு

மட்டக்களப்பு மாவட்டத்தில் ரணவிரு குடும்பங்களுக்கு அமைக்கப்பட்ட 39 வீடுகள், ஏப்ரல் 10ஆம் திகதி உத்தியோகபூர்வமாகக் கையளிக்கப்படவுள்ளனவென, ரணவிரு சேவா அதிகார சபையின் மட்டக்களப்பு மாவட்ட அலுவலர் ரீ.எச்.கீர்திகா ஜயவர்தன தெரிவித்தார்.

ரணவிரு சேவா சங்கத்தின் ஊடாக வீடுகள் வழங்கப்படவுள்ளவர்களுக்கான கூட்டம், மாவட்டச் செயலகத்தில், இன்று (26) நடைபெற்ற போதே, அவர் இவ்வாறு தெரிவித்தார்.

'ரணவிரு சேவா' பயனாளிகளிலிருந்து தெரிவுசெய்யப்பட்ட 39 குடும்பங்களுக்கு ஒவ்வொன்றும் தலா 22 இலட்சத்து 50 ஆயிரம் ரூபாய் செலவில் இந்த வீடுகள் அமைக்கப்பட்டு, பூர்த்திசெய்யப்பட்டுள்ளன.

இவற்றின் திறப்பு விழாவில், ஜனாதிபதி மைத்திரிபால சிறிசேன கலந்துகொண்டு, வீடுகளைக் கையளிக்கவுள்ளனார் எனவும் அன்றையதினம் 500 ரணவிரு குடும்பங்களின் பிள்ளைகளுக்கு கற்றல் உபகரணங்களும் வழங்கப்படவுள்ளதாகவும் ரணவிரு சேவா அதிகாரசபையின் மட்டக்களப்பு மாவட்ட அலுவலர் மேலும் தெரிவித்தார்.