இந்திய மீனவர்களுக்கு விளக்கமறியல்

- செல்வநாயகம் கபிலன்

இலங்கை கடற்பரப்புக்குள் அத்துமீறி நுழைந்து மீன்பிடியில் ஈடுபட்ட குற்றச்சாட்டில் நெடுந்தீவுக்கு அண்மிய கடற்பரப்பில் நேற்று ஞாயிற்றுக்கிழமை (29) அதிகாலை கடற்படையினரால் கைது செய்யப்பட்ட 8 இந்திய மீனவர்களையும் எதிர்வரும் டிசெம்பர் மாதம் 11ஆம் திகதி வரையில் விளக்கமறியலில் வைக்குமாறு ஊர்காவற்றுறை நீதவான் நீதிமன்ற நீதவான் செல்வநாயகம் லெனின்குமார் உத்தரவிட்டார்.

இந்தியா, தமிழகம், இராமநாதபுரத்திலிருந்து 2 படகுகளில் மீன்பிடியில் ஈடுபட்ட மீனவர்களே இவ்வாறு கைது செய்யப்பட்டனர். 

கைது செய்யப்பட்டவர்களில் 16 வயதுடைய சிறுவனும் உள்ளடங்கியிருந்தார்.

மீனவர்களை, கடற்படையினர் யாழ்ப்பாணம் கடற்றொழில் நீரியல் வளத்துறையினரிடம் கையளித்தனர். நீரியல் வளத்துறையினர், நீதவானின் வாசஸ்தலத்தில் மீனவர்களை ஆஜர்ப்படுத்தினர். 

இதன்போதே நீதவான் மேற்கண்டவாறு உத்தரவிட்டார்.