கடலட்டைகளுடன் நான்கு பேர் கைது

செல்வநாயகம் கபிலன்

பருத்தித்துறை கடற்பரப்பில் சட்டவிரோதமான முறையில் கடலட்டை பிடியில் ஈடுபட்ட நான்கு மீனவர்களை கடற்படையினர் கைது செய்து பருத்தித்துறை பொலிஸ் நிலையத்தில் சனிக்கிழமை (06) ஒப்படைத்துள்ளதாக, யாழ். கடற்றொழில் நீரியல்வளதுறை அதிகாரி ஒருவர் தெரிவித்தார்.

இவர்களிடமிருந்து 2,050 அட்டைகளையும் கடற்படையினர் கைப்பற்றியுள்ளதாக பொலிஸார் தெரிவித்தனர்.

கடலட்டைகளை பிடிப்பதற்கு, கடற்றொழில் நீரியல்வளத்துறை திணைக்களம் அனுமதி வழங்கியுள்ள போதும் குறித்த மீனவர்கள் சட்டவிரோதமான முறையில் கடலட்டைகளை பிடித்துள்ளதாக அந்த அதிகாரி  தெரிவித்தார்.

கைதான மீனவர்களுக்கு எதிராக பருத்தித்துறை மாவட்ட நீதிமன்றில் வழக்கு தாக்கல் செய்ய நடவடிக்கை எடுக்கப்பட்டுள்ளதாக பொலிஸார் தெரிவித்தனர்.