நேற்று, இருளில் மூழ்கியது அச்சுவேலி

செல்வநாயகம் கபிலன்

அச்சுவேலி தெற்கு வெட்டுக்குளம் பகுதியில் மின்சார இணைப்பு வயர் மீது தென்னைமரம் முறிந்து வீழ்ந்ததில் அப் பகுதியூடான போக்குவரத்து, நேற்றுத் திங்கட்கிழமை (14) இரவு முற்றாகப் பாதிக்கப்பட்டது.

இரவு 8 மணியளவில்  திடீரென ஏற்பட்ட சுழல் காற்றினால்  வீதியின் அருகிலிருந்த தென்னைமரம் ஒன்று பாரிய சத்தத்துடன் வீழ்ந்துள்ளது. இதனால் மின்சார வயர்கள் அறுந்து வீழ்ந்து வீதியில் விழுந்தன.

குறித்த வீதியூடாக பயணிக்கும் அணைத்து வாகனங்களும் மாற்று வழியூடாக அனுப்பி வைக்கப்பட்டது.
இது தொடர்பில் மின்சாரசபைக்குத் தகவல் வழங்கப்பட்டதை அடுத்து மின்சாரசபையினர் திருத்தப்பணியில் ஈடுபட்டு இன்று செவ்வாய்கிழமை (15) காலை 8 மணியிலிருந்து மின்சாரம் வழங்கப்பட்டுள்ளது.

இதன் காரணமாக அச்சுவேலி பகுதி நேற்று இரவு முற்றாக இருளில் மூழ்கியிருந்தது.