பாரிசவாதத்தால் வடக்கில் 10,000 பேர் பாதிப்பு

-சொர்ணகுமார் சொரூபன்

பாரிசவாத நோயின் தாக்கத்தால் வடக்கில் 10,000 பேர் வரையில் பாதிக்கப்பட்டுள்ளதாக யாழ்ப்பாணம் போதனா வைத்தியசாலை நரம்பியல் வைத்திய நிபுணர் திருமதி அஜந்தா கேசவராஜ் தெரிவித்தார்.

உலக பாரிசவாத நோய் தினமான இன்று யாழ்;ப்பாணம் போதனா வைத்தியசாலையில் ஏற்பாடு செய்யப்பட்ட ஊடகவியலாளர் சந்திப்பின் போதே அவர் இவ்வாறு தெரிவித்தார். 

அவர் அங்கு தொடர்ந்து கூறுகையில்,

ஒரு வாரத்தில் 3 தொடக்கம் 5 வரையானவர்கள் சிகிச்சை பெறுகின்றனர். அத்துடன், வைத்தியசாலையில் காணப்படும் விசேட பாரிசவாத சிகிச்சைப் பிரிவில் 2014ஆம் ஆண்டு தொடக்கம் 2015ஆம் ஆண்டு காலப்பகுதியில் 15 பேர் அனுமதிக்கப்பட்டு, 9 பேர் குணமடைந்ததுடன், 6 பேர் இயலாமல் போயுள்ளனர்.

பாரிசவாதத்தால் அதிகம் பேர் பாதிக்கப்படுகின்ற போதும், சிகிச்சை பெற வருபவர்கள் குறைவாகவுள்ளனர். உலகில் 6 செக்கனுக்கு ஒருவர் இந்த நோயால் இறக்கின்றனர். உலகில் அதிகளவானவர்கள் இறக்கும் நோய்களில் இது இரண்டாவது இடத்தில் உள்ளது. பாரிசவாதத்தால் இறப்பவர்களின் எண்ணிக்கையில் இலங்கை 4 ஆவது இடத்தில் உள்ளது.

பாரிசவாத நோய் ஏற்பட்ட 4 ½ மணித்தியாலங்களுக்குள் நோயாளியை மருத்துவமனைக்குக் கொண்டு செல்வதன் மூலம், முழமையான அந்த நோயிலிருந்து அவரை விடுவிக்க முடியும். நேரம் தாதம் ஆகினால், மூளைக்குச் செல்லும் குருதியின் அளவு குறைவடைந்து மூளைக்கலன்கள் இறக்கத் தொடங்குவதால் நோய் நிரந்தரமாகக்கூடிய வாய்ப்புக்கள் உள்ளன என்றார்.