யாழில் வாழைப்பழத்தின் விலை அதிகரிப்பு

குணசேகரன் சுரேன்

யாழ்ப்பாண மாவட்டத்திலுள்ள சந்தைகளில் வாழைப்பழத்தின் விலை, கடந்த சில நாட்களாக அதிகரித்த நிலையில் காணப்படுகின்றன.

கதலிப் பழம் கிலோகிராம் 100 ரூபாய் தொடக்கம் 130 ரூபாய் வரையிலும், இதரை 1 கிலோகிராம் 70 ரூபாய் முதல் 80 ரூபாய் வரையிலும், கப்பல் 1 கிலோகிராம் 140 ரூபாய் முதல் 150 ரூபாய் வரையிலும் விற்பனை செய்யப்படுகின்றன.

வாழைப்பழச் சந்தைகளில் முக்கியத்துவம் வாய்ந்த மருதனார்மடம், திருநெல்வேலி, சங்கானை ஆகிய சந்தைகளில் இவ்வாறு வாழைப்பழங்கள் விற்பனை செய்யப்படுகின்றன.

யாழ். மாவட்டத்திலுள்ள ஆலயங்களில் திருவிழாக்கள் நடைபெறுகின்றமையும், திருமணம் உள்ளிட்ட நிகழ்வுகள் இம்மாதத்தில் அதிகம் இடம்பெறுவதாலும் கதலி வாழைப்பழத்தின் விலை அதிகரித்துள்ளதாக வியாபாரிகள் தெரிவித்தனர்.

திருமண நிகழ்வில் வாசலில் கட்டப்படும் கதலி வாழையுடன் கூடிய குலையானது ஒரு ஜோடி 5,000 ரூபாய் முதல் 7,000 ரூபாய் விலை போவதாக வாழைத் தோட்ட உரிமையாளர்கள் தெரிவித்தனர்.

விலை அதிகரித்தமையால் அதிகளவானவர்கள் கதலி வாழைப்பழ உற்பத்தியில் அதிக நாட்டம் காட்டுகின்றமையால், இதரை உற்பத்தி குறைவடைந்து அதனுடைய விலையும் அதிகரித்துள்ளதாக வியாபாரிகள் கூறுகின்றனர்.