பாடசாலை நிர்வாகத்திற்கு எதிராக பிரசாரம் செய்த மாணவர்கள் பொலிஸாரினால் எச்சரிக்கப்பட்டனர்

தெல்லிப்பளை மகாஜனாக் கல்லூரி அதிபரினால் தெல்லிப்பளை பொலிஸ் நிலையத்தில் செய்யப்பட்ட முறைப்பாட்டின் அடிப்படையில் இன்று வியாழக்கிழமை எட்டு மாணவர்களும் ஒரு பழைய மாணவனும் பொலிஸ் நிலையம் அழைத்து விசாரித்ததன் பின் எச்சரிக்கை செய்யப்பட்டு விடுவிக்கப்பட்டார்கள்.

மகாஜனாக் கல்லூரியின் நூற்றாண்டு விழாவைக் கொண்டாடுவதையிட்டு பழைய மாணவர்கள் ஒரு சாராருக்கும் பாடசாலை நிர்வாகத்திற்கும் இடையே எற்பட்ட முரண்பாட்டைத் தொடர்ந்து கடந்த சில நாட்களாக 'மகாஜனாவில் பற்றுள்ள புதல்வர்கள்' என்ற பெயரில் துண்டுப் பிரசுரம் அடித்து வெளியிடப்பட்டு வந்தது.

கல்லூரியின் நிர்வாகத்தின் செயற்பாடுகளுக்கு எதிராக விடப்பட்ட துண்டுப் பிரசுரங்களை இன்று பாடசாலை மாணவர்களுக்கு குறிப்பிட்ட மாணவர்கள் கல்லூரியின் வெளி வாசலில் வைத்து விநியோகித்ததாகவும் இதனைத் தொடர்ந்து அதிபர் பொலிஸில் செய்த முறைப்பாட்டை அடுத்தே குறிப்பிட்ட மாணவர்கள் அழைக்கப்பட்டு பொலிஸாரினால் எச்சரிக்கை செய்து விடுவிக்கப்பட்டுள்ளனர்.