யாழ். சுதேச மருந்தகங்கள் மீது திடீர் சோதனை

(கவிசுகி)

யாழ்ப்பாணத்தின் சில பகுதிகளிலுள்ள சுதேச மருந்தகங்கள் மீது மேற்கொள்ளப்பட்ட சோதனை நடவடிக்கையின்போது ஆங்கில மருந்து  விற்பனை செய்தமை கண்டுபிடிக்கப்பட்டதாக யாழ். பிராந்திய சுகாதார அலுவலகம் இன்று வெள்ளிக்கிழமை தெரிவித்துள்ளது.

யாழ். பிராந்திய சுகாதார சேவைகள் பணிப்பாளரின் பணிப்பின் பேரில் திடீர் சோதனைக் குழுவினர் மேற்கொண்ட சோதனை நடவடிக்கையின்போதே ஆங்கில மருந்து விற்பனை செய்தமை கண்டுபிடிக்கப்பட்டுள்ளது.

யாழ்ப்பாணத்தின் முடமாவடி, கல்வியன்காடு, அச்சுவேலி, கதிரிப்பாய் ஆகிய இடங்களிலுள்ள  மருந்தகங்கள் மீது ஏற்கெனவே மேற்கொண்ட சோதனை நடவடிக்கையின்போது ஆங்கில மருந்துகள் விற்பனை செய்தமை கண்டுபிடிப்பட்டு எச்சரிக்கப்பட்டது. இவ்வாறு கண்டுபிடிக்கப்பட்ட மருந்தகங்களில் சில மீண்டும் ஆங்கில மருந்து விற்பனையில் ஈடுபட்டிருப்பது கண்டுபிடிக்கப்பட்டுள்ளதாகவும் இம்மருந்தக உரிமையாளர்களுக்கு எதிராக நீதிமன்றத்தில் வழக்குத் தாக்கல் செய்யப்படவுள்ளதாகவும் யாழ். பிராந்திய சுகாதார அலுவலகம் குறிப்பிட்டுள்ளது.