ஒடுக்கப்பட்ட தொழிலாளரகளின் உரிமைகளை வென்றெடுக்க வேண்டும்

ஒடுக்கப்பட்டுலுள்ள தொழிலாளர் உரிமைகளை வென்றெடுக்க அனைவரும் பேதங்களுக்கு அப்பால் ஒன்றிணைய வேண்டும் என வலிகாமம் மேற்குப் பிரதேச சபை தவிசாளர் திருமதி நாகரஞ்சினி ஐங்கரன் தெரிவித்தார்.

உலக தொழிலாளர் தினத்தை முன்னிட்டு அவரால் வியாழக்கிழமை (30) அனுப்பி வைக்கப்பட்டுள்ள செய்திக்குறிப்பிலேயே இவ்வாறு குறிப்பிடப்பட்டுள்ளது. அதில் மேலும் குறிப்பிடப்பட்டுள்ளதாவது,

இந்த நாள் வரலாற்று ரீPதியான பெருமை மிக்கநாள். தொழிலாளர்களின் உரிமைகள் வென்றெடுக்கப்பட்ட புனித நாள். இந்த நாள் தொழிலாளர்களின் உன்னதமான தியாகத்தின் திருநாள். இந் நன்நாளில் இன்றும் அடக்கப்பட்டு ஒடுக்கப்பட்டு உள்ள தொழிலாளர் உரிமைகளை வென்றெடுக்க அனைவரும் ஒன்றிணைய வேண்டும். இன்று வரை அழிக்கப்பட்டு இடுகாடு ஆக்கப்பட்ட எமது தாயகத்தின் பல பாகங்களிலும் தாக்கப்பட்டு தொழில் இழக்கப்பட்ட தொழிலாளர்கள், மீண்டும் தமது தொழில் உரிமைகளைப் பெறவேண்டும்.

மேலும், திட்டமிட்டு கையகப்படுத்தப்பட்ட எமது புனிதமான மருத நிலங்கள் மீண்டும் மலர்ச்சி பெறவும் பரம்பரையாகவும் தலைமுறையாகவும் எமது என்று மார்தட்டிய நெய்தல் எமக்காகவும் கொடிய யுத்தத்தின் வாயிலாக அழிக்கப்பட்ட முல்லைகளும் அவற்றின் பசுமைகளும் மீண்டும் செழிக்கவும் எமது நிலம் எமது உரிமை என்ற உயரிய உன்னதமான கோசங்கள் வான் வெளிகளுக்கு அப்பால் எம் காவிய நாயகர்களின் காதுகளில் ஒலித்திட ஒன்று பட அனைவரும் எழுந்து வாருங்கள் என அவ்வறிக்கையில் குறிப்பிடப்பட்டிருந்தது.