பங்குச்சந்தை, தங்கம் விலை மற்றும் நாணயமாற்று வீத நிலைவரங்கள்

 

ஜனாதிபதித் தேர்தல் குறித்த அறிவிப்பு வெளியாகியதை தொடர்ந்து, உள்நாட்டு அரசியலில் ஏற்பட்டுள்ள குழப்பகரமான சூழ்நிலையின் காரணமாக கொழும்பு பங்குச்சந்தை ஏற்றத்தாழ்வுகளுடன் கூடிய பெறுமதிகளை பதிவு செய்து வருதை அவதானிக்க முடிந்தது. முதலீட்டாளர்கள் மத்தியில் காணப்படும் அச்சத்துடன் கூடிய உறுதியற்ற நிலை, வலிந்த விற்பனை நடவடிக்கைகள் போன்றன இந்த விலைச்சரிவுக்கு ஏதுவாக அமைந்திருந்தன. எனினும், வெளிநாட்டவர்களின் ஈடுபாடு சந்தையில் தொடர்ந்தும் நிலவி வருகின்றதை அவதானிக்க முடிந்தது. புதிய ஜனாதிபதி தெரிவாகும் வரை இந்த நிலை தொடரலாம் என பரவலாக எதிர்பார்க்கப்படுகிறது. வெள்ளிக்கிழமை நடவடிக்கைகள் நிறைவடைந்த போது அனைத்து பங்கு விலைச் சுட்டெண் 7,153.90 ஆகவும், S&P ஸ்ரீலங்கா 20 சுட்டி 3971.12 ஆகவும் பதிவாகியிருந்தன. 

 

நவம்பர் 24ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 7,893,785,854 அமைந்திருந்தது. கடந்த வாரம் மொத்தமாக 49,807 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 47,661 ஆகவும் வெளிநாட்டு கொடுக்கல் வாங்கல்கள் 2,146 ஆகவும் பதிவாகியிருந்தன. 

 

புக்கிட் தாரா, லங்கா மில்க் புட்ஸ் மற்றும் உடபுசல்லாவ பிளான்டேஷன்ஸ் ஆகியவற்றின் மீதான விலைச்சரிவுகள் காரணமாக அபவிசு மறைபெறுமதியை பதிவு செய்திருந்தது. புரள்வு பெறுமதி 1.7 பில்லியன் ரூபாவை கடந்திருந்தது. உயர் நிகர பெறுமதி வாய்ந்த மற்றும் நிறுவனசார் ஈடுபாடு லாஃவ்ஸ் காஸ் மற்றும் ஹேமாஸ் ஹோல்டிங்ஸ் மீது பதிவாகியிருந்தது. சிறியளவிலான முதலீட்டளர்களின் ஈடுபாடு பிரவுண்ஸ் இன்வெஸ்ட்மன்ட்ஸ், ஏசியா அசெட் ஃபினான்ஸ் மற்றும் சியெர்ரா கேபிளஸ் மீது பதிவாகியிருந்தது. கலப்பு ஈடுபாடு என்பது அக்சஸ் என்ஜினியரிங், பீபிள்ஸ் லீசிங் அன்ட் ஃபினான்ஸ் மற்றும் சன்ஷைன் ஹோல்டிங்ஸ் ஆகியவற்றின் மீது பதிவாகியிருந்தது. வெளிநாட்டர்கள் நிகர கொள்வனவாளர்களாக பதிவாகியிருந்தனர்.

 

நெஸ்லே லங்கா, சிரி ஹோல்டிங்ஸ் மற்றும் ஹற்றன் நஷனல் வங்கி ஆகியவற்றின் மீது விலை உயர்வுகள் பதிவாகியிருந்தமையின் காரணமாக சுட்டிகள் நேர் பெறுமதியை பதிவு செய்து நிறைவடைந்திருந்தன. புரள்வு பெறுமதி 1.0 பில்லியன் ரூபாவை கடந்திருந்தது. உயர் தேறிய பெறுமதி வாய்ந்த மற்றும் நிறுவனசார் ஈடுபாடு கொமர்ஷல் வங்கி மற்றும் யூனியன் வங்கி ஆகியவற்றின் சந்திப்புகளின் மூலம் பதிவாகியிருந்தது. ஏசியா அசெட் ஃபினான்ஸ் மற்றும் பான் ஏசியா பவர் ஆகியவற்றின் மீது சிறியளவிலான முதலீட்டாளர்களின் ஈடுபாடு பதிவாகியிருந்தது. அக்சஸ் என்ஜினியரிங், பீபிள்ஸ் லீசிங் அன்ட் ஃபினான்ஸ் மற்றும் ஹேமாஸ் ஹோல்டிங்ஸ் பங்குகள் மீது கலப்பு ஈடுபாடு பதிவாகியிருந்தது. இதேவேளை வெளிநாட்டவர்கள் அதிகளவு பங்கு கொள்வனவில் ஈடுபட்டிருந்தனர். கொமர்ஷல் வங்கி மற்றும் ஹற்றன் நஷனல் வங்கி பங்குகளின் கொள்வனவில் ஆர்வம் செலுத்தியிருந்தனர்.

 

ஜோன் கீல்ஸ் ஹோல்டிங்ஸ், நெஸ்லே லங்கா மற்றும் புக்கிட் தாரா ஆகிய பங்குகளின் மீது விலைச்சரிவு காரணமாக சுட்டிகள் மறைபெறுமதிகளை பதிவு செய்து நிறைவடைந்திருந்தன. புரள்வு பெறுமதி 1.7 பில்லியன் ரூபாவை கடந்திருந்தது. உயர் தேறிய பெறுமதி வாய்ந்த நிறுவனசார் ஈடுபாடு ஜோன் கீல்ஸ் ஹோல்டிங்ஸ், டயலொக் ஆக்சியாடா மற்றும் பீபிள்ஸ் லீசிங் அன்ட் ஃபினான்ஸ் ஆகிய பங்குகளின் மீது பதிவாகியிருந்தது. சிறியளவிலான முதலீட்டாளர்களின் ஈடுபாடு லங்கா சீமெந்து, ஏசியா அசெட் ஃபினான்ஸ் மற்றும் ரேணுகா ஹோல்டிங்ஸ் உரிமை பங்குகளின் மீது பதிவாகியிருந்தது. டெக்ஸ்ச்சர்ட் ஜேர்சி லங்கா மற்றும் அக்சஸ் என்ஜினியரிங் பங்குகளின் மீது கலப்பு ஈடுபாடு பதிவாகியிருந்தது. வெளிநாட்டவர்கள் பஙகு கொள்வனவில் ஆர்வம் செலுத்தியிருந்தனர்.

 

கொமர்ஷல் வங்கி, ஸ்ரீலங்கா ரெலிகொம் மற்றும் ஹற்றன் நஷனல் வங்கி ஆகியவற்றின் மீதான விலைச்சரிவு காரணமாக சுட்டிகள் தொடர்ந்தும் சரிவுப் பெறுமதியில் நிறைவடைந்திருந்தது. புரள்வு பெறுமதி 1.3 பில்லியன் ரூபாவை கடந்திருந்தது. உயர் தேறிய பெறுமதி வாய்ந்த நிறுவனசார் ஈடுபாடு அக்சஸ் என்ஜினியரிங் மற்றும் ஹற்றன் நஷனல் வங்கி வாக்குரிமையற்ற பங்குகள் ஆகியவற்றின் மீது பதிவாகியிருந்தது. வலிபல் வன், ஃபர்ஸ்ட் கெப்பிட்டல் ஹோல்டிங்ஸ் மற்றும் கொமர்ஷல் கிரெடிட் அன்ட் ஃபினான்ஸ் ஆகியவற்றின் மீது சிறியளவிலான முதலீட்டாளர்களின் ஈடுபாடு பதிவாகியிருந்தது. கலப்பு ஈடுபாடு லங்கா ஐஓசி மற்றும் பீபிள்ஸ் லீசிங் அன்ட் ஃபினான்ஸ் பங்குகளின் மீது பதிவாகியிருந்தது. மேலும், வெளிநாட்டவர்கள் அதிகளவு பங்கு கொள்வனவில் ஆர்வம் செலுத்தியிருந்தனர்.

 

அபவிசு நேர் பெறுமதியுடனும், S&P SL20 மறைபெறுமதியையும் பதிவு செய்திருந்ததுடன், புரள்வு பெறுமதி 2.0 பில்லியன் ரூபாவாக பதிவாகியிருந்தது. சென்ரல் ஃபினான்ஸ், அக்சஸ் என்ஜினியரிங், லங்கா அஷோக் லேலான்ட், பைரஹா ஃபார்ம்ஸ், ஆசிரி ஹொஸ்பிட்டல்ஸ், யூனியன் வங்கி மற்றும் கொமர்ஷல் வங்கி ஆகிய பங்குகள் புரள்வு பெறுமதியில் 64 வீத பங்களிப்பை வழங்கியிருந்தன. லங்கா சீமெந்து, லங்கா சென்ச்சரி இன்வெஸ்ட்மன்ட்ஸ் மற்றும் சுவிஸ்டெக் ஆகிய பங்குகளின் மீது சிறியளவிலான முதலீட்டாளர்களின் ஈடுபாடு பதிவாகியிருந்தது. லங்கா ஐஓசி, டோக்கியோ சீமெந்து வாக்குரிமையற்ற பங்குகள் மற்றும் செலான் வங்கி வாக்குரிமையற்ற பங்குகள் ஆகியவற்றின் மீது கலப்பு ஈடுபாடு பதிவாகியிருந்தது. வெளிநாட்டவர்கள் அதிகளவு பங்கு கொள்வனவில் ஈடுபட்டிருந்தனர். 

 

கடந்த வார கொடுக்கல் வாங்கல் நடவடிக்கைகளில் ஒஃபிஸ் எக்யுப்மன்ட், ஷலிமர், அனிலானா ஹோட்டல்ஸ், குட் ஹோப் மற்றும் ஹேமாஸ் பவர் போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

லங்கா சீமெந்து, சிட்ரஸ் லெய்ஷர் (உரிமை), ஒரியன்ட் காமன்ட்ஸ், சிலோன் லெதர் (உரிமை) மற்றும் எஸ்எம்பி லீசிங் (சாதாரண) போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

 

கடந்த வாரம் 24 கெரட் தங்கத்தின் சராசரி விலை 43,400 ரூபாவாகவும், 22 கெரட் தங்கத்தின் விலை 41,200 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 133.15 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 209.96 ஆக காணப்பட்டிருந்தது.