உழுந்து பயிர்ச் செய்கையில் அதிகரிப்பு

கே.கண்ணன், சுப்பிரமணியம் பாஸ்கரன்

கடந்த காலத்தை விட தற்போது உழுந்து பயிர்ச் செய்கையில் அதிகரிப்பு ஏற்பட்டுள்ளதாக வவுனியா மாவட்ட கமநல அபிவிருத்தி திணைக்கள உதவி ஆணையாளர் ஆர்.விஜயகுமார் தெரிவித்துள்ளார்.

இது தொடர்பில் அவர் மேலும் தெரிவிக்கையில்,

வவுனியா மாவட்ட கமநல அபிவிருத்தித் திணைக்களத்துக்குட்பட்ட பகுதிகளில் 2016 -2017 காலபோக பயிர்ச் செய்கையின் போது உப  உணவுப் பயிரான உழுந்துச் செய்கையினை பதினெட்டாயிரம்   ஏக்கரில்  விவசாயிகள்  மேற்கொண்டுள்ளனர்.

வவுனியா மாவட்ட கமநல அபிவிருத்தித் திணைக்களத்துக்குட்பட்ட  எட்டு கமநல சேவை நிலையங்களின் கீழ் உள்ள விவசாயிகள் தமது  மேட்டுநிலக் காணிகளில் உழுந்துப் பயிர்செய்கை மேற் கொண்டுள்ளனர்.  உழுந்துப் பயிர் செய்கைக்கு மழை வீழ்ச்சி குறைவாக இருந்த போதும் தற்போது பனியின் தாக்கம் நன்மையாகவே காணப்படுகின்றது. கடந்த காலங்களை விட இம்முறை அதிகமாக உழுந்துப் பயிர்செய்கை மேற்கொள்ளப்பட்டுள்ளது.

ஆயினும் இனிவரும் மாதங்களில் கால நிலை மாற்றம் ஏற்பட்டு தொடர்ந்து அதிக மழை பெய்யும் பட்சத்தில் உழுந்து செய்கை பாதிக்கப்படக் கூடிய சூழ்நிலை ஏற்படலாம் எனவும் அவர் மேலும் தெரிவித்தார்.