வவுனியா வளாகத்தை வன்னி பல்கலைக்கழகமாக மாற்றக்கோரி பேரணி

-க.அகரன்

வவனியா வளாகத்தினை வன்னி பல்கலைக்கழமாக மாற்றக்கோரி,  வவுனியாவில் பேரணியொன்று இன்று இடம்பெற்றது.

யாழ். பல்கலைக்கழகத்தின் வவுனியா வளாகமாக, கடந்த 25 ஆண்டுகளாக இயங்கும், வவுனுவில் இயங்குளம் வளாகத்தினை, தனியான வன்னி பல்கலைக்கழகமாக மாற்றக்கோரி இப்பேரணி ஏற்பாடு செய்யப்பட்டது.

வவுனியா, குருமன்காட்டிலுள்ள விஞ்ஞான பீடத்தில் இருந்து, ஆரம்பமான இப்பேரணி, ரயில்  நிலையவீதி வழியாக, கண்டிவீதியை சென்றடைந்து, நகர் வீதியின் ஊடாக, வவுனியா மாவட்ட செயலகத்தைச் சென்றடைந்தது.

அதனையடுத்து, வவுனியா மாவட்ட செலாளர் ரோஹண புஸ்பகுமாரவிடம், ஜனாதிபதியிடம் கையளிக்குமாறு கோரி, மகஜரொன்று, வவுனியா வளாக ஆசிரியர் சங்கத்தினரால் கையளிக்கப்பட்டது.

இதனையடுத்து, புதிய பஸ் நிலையம் வரை சென்ற பேரணி, அங்கு இடம்பெற்ற பொதுக்கூட்டத்துடன் நிறைவடைந்தது.
இந்த பேரணியில், வன்னி மாவட்ட நாடாளுமன்ற உறுப்பினர்களான சிவசக்தி ஆனந்தன், செல்வம் அடைக்கலநாதன், சாந்தி ஸ்ரீஸ்கந்தராஜா, சி. சிவமோகன், சார்ள்ஸ் நிர்மலநாதன், கே. கே. மஸ்தான், மாகாண சுகாதார அமைச்சர் ப. சத்தியலிங்கம்,  பிரதி அவைத்தலைவர் கமலேஸ்வரன்,  உறுப்பினர்களாக செ. மயூரன், ஆர். இந்திரராஜா, ஜி.ரி.லிங்கநாதன், எம். தியாகராசா உள்ளிட்டவர்ளும்,  பாடசாலை மாணவர்கள், பல்கலைக்கழக மாணவர்கள், விவசாய அமைப்புகளின் பிரதிநிதிகள், பொது அமைப்புகளின் பிரதிநிதிகள், அரசாங்க உத்தியோகத்தர்கள், பல்கலைக்கழக விரிவுரையாளர்கள், ஊடகவியலாளர்கள், இளைஞர்கள் உட்பட பலரும் கலந்துகொண்டிருந்தனர்.