தடைசெய்யப்பட்ட வலைகளை நந்திக்கடலில் பயன்படுத்துவோருக்கு சட்ட நடவடிக்கை

-எஸ்.றொசேரியன் லெம்பேட்

நந்திக்கடலில் தற்போது அதிகளவில் இறால் பிடிபடும் காலம் ஆகையால் வட்டுவாகல் நந்திக்கடல் பகுதியில் இரவு வேளைகளில் தடை செய்யப்பட்ட வலைகளைப் பயன்படுத்தி இறால் பிடிப்பவர்களுக்கு எதிராக சட்ட நடவடிக்கை மேற்கொள்ளப்படும் என வட மாகாண மீன்பிடி அமைச்சர் பா.டெனிஸ்வரன் தெரிவித்தார்.

தடைசெய்யப்பட்ட தங்கூசி வலை, கூட்டு வலை, படுப்பு வலைகளைப் பயன்படுத்தி இறால்; மற்றும் மீன்பிடியில் ஈடுபடுவதாக அங்குள்ள மக்கள் வட மாகாண மீன்பிடி அமைச்சர் பா.டெனிஸ்வரனுக்கு முறைப்பாடு செய்துள்ளனர்.

இவ்விடயம் குறித்து கவனத்திற்கொண்டு தடை செய்யப்பட்ட தொழில் முறைகளை கையாண்டு எமது கடல் வளத்தை சுரண்டுகின்ற எவருக்கும் இடமளிக்காது உடன் சட்ட நடவடிக்கை மேற்கொள்ளுமாறு முல்லைத்தீவு மாவட்ட அதிகாரிகளுக்கு அமைச்சர் பணித்துள்ளார்.

ஒரு சிலரது சுயநலத்துக்காக எமது கடல் வளத்தை அழிக்க முடியாது எனவும் சட்டத்தின் முன் யாவரும் ஒருவரே எனவும் அவர் தெரிவித்துள்ளார்.