முல்லைத்தீவு உள்ளுராட்சி மன்றங்களுககான தேர்தல் ஏற்பாடுகள் பூர்த்தி

- நடராசா கிருஷ்ணகுமார்

எதிர்வரும் 28 ஆம் திகதி நடைபெறவுள்ள முல்லைத்தீவு மாவட்டத்தின் கரைத்துறைப்பற்று, புதுக்குடியிருப்பு பிரதேச சபைகளுக்கான தேர்தல் ஏற்பாடுகள் பூர்த்தி செய்யப்பட்டுள்ளதாக முல்லைத்தீவு மாவட்டச் செயலாளர் நாகலிங்கம் வேதநாயகம் திங்கட்கிழமை (23) தெரிவித்தார்.

இதுதொடர்பாக அவர் மேலும் கூறுகையில்,

11 ஆசனங்களைக் கொண்ட கரைத்துறைப்பற்று பிரதேச சபையில் 29,279 பேர் வாக்களிக்கத் தகுதி பெற்றுள்ளனர். 9 ஆசனங்களைக் கொண்ட புதுக்குடியிருப்பு பிரதேச சபையில் 23,559 பேர் வாக்களிக்கத் தகுதி பெற்றுள்ளனர்.

வாக்காளர்கள் வாக்களிப்பதற்காக கரைதுறைபற்றில் 50 வாக்களிப்பு நிலையங்களும், புதுக்குடியிருப்பில் 45 வாக்களிப்பு நிலையங்களும் என 95 வாக்களிப்பு நிலையங்கள் அமைக்கப்படுகின்றன. 6 வாக்கெண்ணும் நிலையங்களும் அமைக்கப்படவுள்ளன' என அவர் மேலும் தெரிவித்தார்.

வன்னியின் புதுகுடியிருப்பு மற்றும் கரைத்துறைப்பற்று ஆகிய பிரதேச சபைகளுக்கான தேர்தல்கள் மீள்குடியேற்றங்களை காரணம் காட்டி இந்த பிரதேச சபைகளின் தேர்தல்கள் ஒத்திவைக்கப்பட்டு வந்தன.

இந்த நிலையில் பெப்ரவரி 28ஆம் திகதியன்று இந்த பிரதேச சபைகளின் தேர்தல்கள் நடைபெறவுள்ளமை குறிப்பிடத்தக்கது.