கவர்ச்சியாக நடிக்கவைத்து மதிப்பை குறைத்துவிட்டனர்: தப்ஸி கவலை

'ஆடுகளம்' திரைப்படத்தில் தமிழில் அறிமுகமானவர் நடிகை தப்ஸி, தற்போது அவருக்கு தமிழில் திரைப்பட வாய்ப்புகள் இல்லை. தெலுங்கிலும் ஒரு திரைப்படத்தில் மட்டுமே நடிக்கிறார்.

இதனால் வாய்ப்பு தேடி பொலிவூட் பக்கம் சென்ற தப்ஸிக்கு 2 ஹிந்தி திரைப்படங்களில் நடிக்க வாய்ப்பு கிடைத்துள்ளது.  

இது தொடர்பில் தப்ஸி தெரிவிக்கையில், 'நான் சினிமாவில் அறிமுகமான புதிதில் நிறைய திரைப்படங்களில் என்னை கவர்ச்சியாகவே நடிக்க வைத்தார்கள். தெலுங்கு திரைப்படங்களில் அப்படித்தான் நான் வந்தேன். இதனால் என் மீதான மதிப்பு குறைந்தது. கவர்ச்சி வேடங்களில் நடிக்கவே வாய்ப்புகள் வந்தன.

எனது நடிப்பு திறமையை வெளிப்படுத்த வாய்ப்புகள் அமையாமல் போனது. ஆனால், இப்போது ஹிந்தியில் எனது கதாபாத்திரத்துக்கு முக்கியத்துவம் அளிக்கும் கதைகள் வந்துள்ளன. இதன் மூலம் எனது நடிப்புத் திறமையை வெளிப்படுத்துவேன்.

ஹிந்தியில் சிறந்த நடிகைகள் நிறைய பேர் இருக்கிறார்கள். அவர்களின் போட்டியை சமாளித்து நிலைத்து இருப்பது கஷ்டம். ஹிந்தியில் சிறந்த நடிகை என்று பெயர் வாங்கிய பிறகு மற்ற மொழி திரைப்படங்களிலும் நல்ல கதையம்சம் உள்ள திரைப்படங்களை தேர்வு செய்து நடிப்பேன்' என்கிறார் தப்ஸி.