ஒரு நாள் தோழி

தனுஷ் தயாரிக்கும் 'அம்மா கணக்கு' திரைப்படத்தில் அமலா பால், ரேவதி நடிக்கிறார்கள்.

24 வயது பெண் 18 வயது சிறுமிக்கு அம்மாவாக நடிக்கும் வித்தியாசமான கதை. ஹிந்தி, தமிழ் மொழிகளில் தயாராகி வருகிறது. இதில் அமலாபால் வானகரத்தில் உள்ள பிரமாண்ட மீன் சந்தையில் மீன் விற்கும் பெண்ணாக நடிக்கிறார்.

அவர் மீன் விற்கும் பெண்ணாக நடிக்கும் காட்சி, வானகரத்தில் உள்ள மீன் சந்தையில் ஒரு நாள் நடந்தது. 
அப்போது இயக்குநர், இந்த காட்சிகளில் அமலாபாலுக்கு ஒரு தோழி இருந்தால் நன்றாக இருக்குமே என்று கருதியிருக்கிறார். 

உடனே சுற்றும் முற்றும் பார்த்தவர் அங்கு எளிய அழகு, சாந்தமான முகத்துடன் மீனவ பெண்ணின் அச்ச அசல் சாயலில் நின்று கொண்டிருந்த மகேஸ்வரி என்ற பெண்ணை அழைத்து சில மணி நேரம் பயிற்சி கொடுத்து அமலாபாலின் தோழியாக நடிக்க வைத்து விட்டார்.

மகேஸ்வரி ஒரு சில காட்சியில் நடித்திருந்தாலும் அது படத்தில் பளிச்சென்று தெரியுமாம். இதனால் மகேஸ்வரிக்கு மேலும் வாய்ப்புகள் குவியலாம் என்று வானகர மீன் வியாபாரிகள் மகிழ்ச்சியில் இருக்கிறார்கள்.