துரைவந்தியமேட்டு பிரதான வீதி சேதம்; பயணிகள் சிரமம்

(ஹனீக் அஹமட்)

துரைவந்தியமேடு கிராமத்தின் பிரதான வீதி சேதமடைந்து காணப்படுவதால், அந்த வீதியால் பயணிக்கும் மக்கள் பெரும் சிரமத்தை எதிர்நோக்கி வருகின்றனர்.

கல்முனை மாநகரசபைக்குட்பட்ட துரைவந்தியமேடு கிராமமானது, கல்முனை – மட்டக்களப்பு பிரதான வீதியிலிருந்து கிட்டத்தட்ட 04 கிலோமீற்றர் தூரத்தில் அமைந்துள்ளது. இக்கிராமம் அம்பாறை மாவட்டத்தின் கடைசிக் கிராமமும் ஆகும்.  

ஒரு தீவு போல் காணப்படும் இந்தக் கிராமத்துக்கு சென்று வருதற்கு வடக்குப் புறமாக ஒரு வீதியும் தெற்குப் புறமாக ஒரு வீதியுமாக இரண்டு பிரதான வீதிகளே உள்ளன. இந்த இரு பிரதான வீதிகளில் துறைநீலாவணையிலிருந்து துரைவந்தியமேட்டுக்குச் செல்லும் பிரதான வீதி மிகவும் சேதடைந்து காணப்படுகின்றது.

ஏற்கெனவே குன்றும்  குழியுமாகக் காணப்பட்ட இந்த வீதி, அண்மையில் ஏற்பட்ட வெள்ளப்பெருக்கால் மேலும் மோசமாகப் பாதிக்கப்பட்டு பொதுமக்கள் பயணிப்பதற்கு சிரமமாகவுள்ளதாக மக்கள் கவலை தெரிவிக்கின்றனர்.

பாரமான பொருட்களுடன் சைக்கிளில் பயணிப்போர்  சைக்கிள்களை ஓட்டமுடியாத நிலையில்  தள்ளிக்கொண்டு செல்கின்றனர். எனவே, உரியவர்கள் தலையிட்டு இந்த வீதியை உடனடியாக புனரமைத்துத் தருமாறு அப்பிரதேச மக்கள் கோரிக்கை விடுகின்றனர்.