வீட்டுத்தோட்ட முயற்சியாளர்களுக்கு பயிர் விதைகள் வழங்கும் நிகழ்வு

(எஸ்.எம்.எம்.றம்ஸான்)

அம்பாறை மாவட்டத்தில்  அண்மையில் ஏற்பட்ட வெள்ளம் காரணமாக  பாதிக்கப்பட்ட  சாய்ந்தமருது விவசாய போதனாசிரியர் பிரிவுக்குட்பட்ட வீட்டுத்தோட்ட முயற்சியாளர்களுக்கு பயிர் விதைகள் வழங்கும் நிகழ்வு நேற்று திங்கட்கிழமை நடைபெற்றது.

சாய்ந்தமருது கமநல சேவை மத்திய நிலையத்தில் சாய்ந்தமருது விவசாய போதனாசிரியர் எம்.எம்.எம்.ஜெமில் தலைமையில் நடைபெற்ற இந்த நிகழ்வில் உலக உணவு விவசாய நிறுவனத்தின்  அம்பாறை மாவட்ட இணைப்பாளர் எம்.மார்க்கண்டு பிரதம அதிதியாகவும் சாய்ந்தமருது பிரதேச செயலக உதவித்திட்ட உத்தியோகத்தர் ஏ.எல்.ஏ.மஜீட், சாய்ந்தமருது கோட்ட பாடசாலைகளின் சுற்றாடல் மேம்பாட்டு இணைப்பாளர் எம்.ஐ.எம்.அஸ்ஹர் ஆகியோர் கௌரவ அதிதிகளாக கலந்து கொண்டனர்.

கிழக்கு மாகாணத்தில் பாதிக்கப்பட்ட விவசாயிகளுக்கான அவசர உதவி, விவசாய மீட்சி திட்டத்தின் கீழ் அவுஸ்திரேலிய அரசாங்கத்தின் உதவியுடன் உலக உணவு விவசாய நிறுவனம் இந்நிகழ்வை ஒழுங்கு செய்திருந்தது.