'தேசமான்ய' பட்டம் பெற்றமைக்காக புஸ்பகுமாருக்கு கௌரவம்

அகரம் சமூக அமைப்பினால் கடந்த புதன்கிழமை அம்பாறை மாவட்ட ஜனாதிபதி ஆலோசகரும் பீடோ அமைப்பின் நிறைவேற்றுப் பணிப்பாளருமான கு.புஸ்பகுமாருக்கு பாராட்டு வைபவமொன்று ஏற்பாடு செய்யப்பட்டிருந்தது.

இலங்கையின் இரண்டாவது அதியுயர் விருதான 'தேசமான்ய' விருது அண்மையில் புஸ்பகுமாருக்கு வழங்கப்பட்டிருந்தது. இதனை பாராட்டி கௌரவிக்குமுகமாகவே மேற்படி நிகழ்வு ஏற்பாடு செய்யப்பட்டிருந்தது.

இந்நிகழ்வானது அகரம் முன்பள்ளி பாடசாலை வளாகத்தில் அகரம் அமைப்பின் தலைவர் எஸ்.துஷாந்தன் தலைமையில் இடம்பெற்றது. இந்நிகழ்வில் தேசமான்ய கலாநிதி கு.புஸ்பகுமாருக்கு பொன்னாடை போர்த்தி கௌரவிக்கப்பட்டதுடன் வாழ்த்துப்பா மாலையும் வழங்கப்பட்டது.

அன்றைய நிகழ்வின்போது அதிதிகளாக கல்முனை கல்வி வலய சிரேஷ்ட தமிழ் மொழிப்பாட ஆலோசகரும், ஓய்வுபெற்ற அதிபர்களும் புத்திஜீவிகளும் மற்றும் அகர அமைப்பின் அங்கத்தவர்களும் கலந்து சிறப்பித்திருந்தனர்.