இரும்புப்பந்து என எண்ணி விளையாடிய கைக்குண்டு வெடித்ததில் சிறுவன் பலி

(எஸ்.மாறன்)

அக்கரைப்பற்று பிரதேச வெற்றுக்காணி ஒன்றில் கிடந்த கைக்குண்டு ஒன்றை பந்து என எண்ணி எறிந்து விளையாடிய போது அது வெடிப்புக்குள்ளானதில் சிறுவனொருவன் உயிரிழந்ததுடன் மற்றுமொரு சிறுவன் காயங்களுக்கு உள்ளான நிலையில் வைத்தியசாலையில் அனுமதிக்கப்பட்டுள்ளான்.

பதூர்நகர் பள்ளிவாசலுக்கு அருகிலுள்ள வெற்றுக் காணியில் இன்று பிற்பகல் 3.30 மணியளவில் இந்த சம்பவம் இடம்பெற்றுள்ளது.

இதில் பதூர்நகரைச் சேர்ந்த நிலாஸ் (12 வயது) என்ற சிறுவனே உயிரிழந்தவனாவான். அதே பிரதேசத்தைச் சேர்ந்த இக்கினாஸ் (வயது 16) என்ற சிறுவன் படுகாயமடைந்த நிலையில் அக்கரைப்பற்று ஆதார வைத்தியசாலையில் அனுமதிக்கப்பட்டுள்ளார்.

சம்பவம் தொடர்பான மேலதிக விசாரணைகளை அக்கரைப்பற்று பொலிஸார் மேற்கொண்டு வருகின்றனர்.