ஹிங்குராண சீனித் தொழிற்சாலை உற்பத்தி நடவடிக்கைகள் ஜூனில் மீண்டும் ஆரம்பம்

(எம்.சி.அன்சார்)

நீண்ட காலமாக மூடப்பட்டிருந்த அம்பாறை ஹிங்குராண சீனித்தொழிற்சாலையின் உற்பத்தி நடவடிக்கைகள் மீண்டும் இவ்வருடம் ஜூன் மாதமளவில் ஆரம்பிக்கவுள்ளதாக கல்லோயா பெருந்தோட்டக் கம்பனியின் நிறைவேற்று அதிகாரி காமினி ரட்னாயக்கா தெரிவித்தார்.

மஹிந்த சிந்தனை வேலைத்திட்டத்தின் கீழ் மேற்படி 1,900 மில்லியன் ரூபாய் செலவில் புனரமைக்கப்பட்டு வருகின்றது. இந்நிலையில், எதிர்வரும் ஜூன் மாதமளவில் கரும்பை அறுவடை செய்து அதனை சீனியாக மாற்றுவதற்கான சகல நடவடிக்கைகளும் எடுக்கப்பட்டுள்ளதுடன், சீனியினை சுத்திகரிப்பது முதல் சீனி உற்பத்தியினை மேற்கொள்வதற்கும் திட்டமிடப்பட்டுள்ளது.

இந்த தொழிற்சாலையினால் நாளொன்றுக்கு 160 மெற்றிக்தொன் சீனியினை உற்பத்தி செய்ய முடியும். இத்தொழிற்சாலையின் உற்பத்தி நடவடிக்கையினை ஆரம்பிப்பதன் மூலம் 1,100 பேருக்கு நேரடி வேலைவாய்ப்பினை வழங்க முடியும்.

இவ்வருடம் 1300 ஹெக்டெயர் நிலத்தில் கரும்புச் செய்கை மேற்கொள்ள்பட்டு வருவதுடன், கடந்த வருடம் 750 ஹெக்டெயர் நிலத்தில் கரும்புச் செய்கை மேற்கொள்ளப்பட்டது.

இத்தொழிற்சாலை ஆரம்பிக்கப்படுவதற்கு முன்னர் இந்தியாவிலிருந்து இறக்குமதி செய்யப்பட்டு சீனி சுத்திகரிக்கப்படவுள்ளது என கல்லோயா பெருந்தோட்டக் கம்பனியின் நிறைவேற்று அதிகாரி மேலும் தெரிவித்தார்.