த.தே.கூ.வின் ஆலையடிவேம்பு பிரதேச சபை உறுப்பினராக வைரமுத்து தியாகராசா நியமனம்

(எஸ்.மாறன்)

தமிழ்த் தேசிய கூட்டமைப்பு உறுப்பினரான வைரமுத்து தியாகராசா, ஆலையடிவேம்பு பிரதேச சபையின் புதிய உறுப்பினராக நேற்று புதன்கிழமை மாலை அக்கரைப்பற்றிலுள்ள கட்சியின் செயலாளர் நாயகம் மாவை சேனாதிராஜா முன்னிலையில் சத்தியப்பிரமாணம் செய்துகொண்டுள்ளார்.

ஆலையடிவேம்பு பிரதேச சபை உறுப்பினரான வடிவேலு துஷ்யந்தன், கடந்த வருடம் சுகயீனமுற்ற நிலையில் உயிரிழந்ததையடுத்து இவ்வெற்றிடத்திற்கு கண்ணகிபுரம் பிரதேசத்தைச் சேர்ந்த வைரமுத்து தியாகராசா நியமிக்கப்பட்டார். இதற்கான சத்தியப்பிரமாணம் அக்கரைப்பற்றில் பொத்துவில் தொகுதி அமைப்பாளரின் இல்லத்தில் நடைபெற்றது.

வைரமுத்து தியாகராசா கடந்த வருடம் நடைபெற்ற பிரதேசசபை தேர்தலில் தமிழ் தேசிய கூட்டமைப்பில் போட்டியிட்டு சொற்ப வாக்குகளால் தோல்வியடைந்ததுடன் இப்பிரதேசத்தில் கடந்த 1979ஆம் ஆண்டு தொடக்கம் மக்களுக்காக பல சேவையை ஆற்றிவந்ததற்காக ஆலையடிவேம்பு  பிரதேச செயலகத்தினால் 2007ஆம் ஆண்டு பொதுப்பணி துறையில் கௌரவிக்கப்பட்டுள்ளது குறிப்பிடத்தக்கது.