இரண்டாவது தடவையாக அக்கரைப்பற்று ஆதார வைத்தியசாலை தாதியர்களின் போராட்டம்

(எஸ்.மாறன்)

15 அம்சக் கோரிக்கைகளை  முன்வைத்து அக்கரைப்பற்று ஆதார வைத்தியசாலையைச் சேர்ந்த  தாதியர்கள் இன்று வியாழக்கிழமை இரண்டாவது தடவையாகவும் கவனயீர்ப்பு போராட்டத்தில் ஈடுபட்டனர்.

அக்கரைப்பற்று ஆதார  வைத்தியசாலை முன்றலில் அக்கரைப்பற்று கிளைச் சங்கத் தலைவர் க.வினோத் தலைமையில் நடைபெற்ற இவ் போராட்டத்தில் தாதியர்கள் பதாகைகளைத் தாங்கியவாறும் கோஷங்களை எழுப்பியவாறும்  கவனயீர்ப்பு போராட்டத்தில் ஈடுபட்டனர்.

'சுகாதார அமைச்சே கடந்த 15 வருடங்களுக்கு மேலாக வேலை நிறுத்தத்தில் ஈடுபடாத தாதியர்களை வேலை நிறுத்தத்திற்கு தூண்டாதே', 'சீருடைக் கொடுப்பனவை 15,000 ரூபாவாக அதிகரி', 'வைத்தியர்களுக்கு வழங்கும் தொலைபேசிக் கொடுப்பனவை எமக்கும் வழங்கு', '2009ஆண்டின் 19ஆவது சுற்றுநிரூபத்தை நடைமுறைபடுத்துவதற்கான தடையை நீக்கு' போன்ற சுலோகங்கள் எழுதப்பட்ட பதாதைகளுடன் தாதியர்கள் அரை மணித்தியாலயம் கவனயீர்ப்பு போராட்டத்தில் ஈடுபட்டனர்

அரச தாதியர் சங்கம் நாடளாவிய ரீதியில் 15 அம்சக் கோரிக்கைகளை  முன்வைத்து கடந்த ஜனவரி மாதம் 31ஆம் திகதி கவனயீர்ப்பு போராட்டத்தில் ஈடுபட்டனர். இருப்பினும்  சுகாதார அமைச்சு இதற்கான உரிய பதிலை வழங்காததை அடுத்து இரண்டாவது தடவையாகவும் இன்றையதினம் கவனயீர்ப்பு போராட்டத்தில் ஈடுபட்டனர்.