'தேசத்திற்கு மகுடம் கண்காட்சியினை முன்னிட்டு அம்பாறை மாவட்டத்தின் அனைத்து பிரதேசங்களும் அபிவிருத்தி

2013 ஆம் ஆண்டு நடைபெறவுள்ள தேசத்திற்கு மகுடம் கண்காட்சியை முன்னிட்டு அம்பாறை மாவட்டத்தின் அனைத்து பிரதேசங்களும் எந்தவித பாகுபாடுடின்றி சரிசமமாக அபிவிருத்தி செய்யப்படும் என தொலைத்தொடர்பு அமைச்சர் ரஞ்ஜித் சியம்பலாப்பிட்டிய தெரிவித்தார்.

இந்த அபிவிருத்தி திட்டங்களை பாகுபாடுடின்றி இடம்பெற வேண்டும் என ஜனாதிபதி மஹிந்த ராஜபக்ஷ தெரிவித்துள்ளதாகவும் அவர் குறிப்பிட்டார்.

தேசத்திற்கு மகுடம் கண்காட்சி அம்பாறை மாவட்டத்தில் நடைபெறவுள்ள இடங்களை பார்வையிட்ட பின்னர், மகாஒயா பிரதேச சபையில் இடம்பெற்ற விஷேட கூட்டத்திலேயே அமைச்சர் ரஞ்ஜித் சியம்பலாப்பிட்டிய மேற்கண்டவாறு குறிப்பிட்டார்.

அம்பாறை மாவட்டத்தின் மகாஒயா, அரங்குவ மற்றும் அரந்தலாவ ஆகிய பிரதேசங்கள் தேசத்திற்கு மகுடம் கண்காட்சி நடத்துவதற்காக தெரிவு செய்யப்பட்டுள்ளன.

இந்த பிரதேசங்களுக்கு தொலைத்தொடர்பு அமைச்சர் ரஞ்ஜித் சியம்பலப்பிட்டிய, சிரேஷ்ட அமைச்சர் பி.தயாரத்ன, நாடாளுமன்ற உறுப்பினர்களான சரத் வீரசேகர, சிரியானி அமரசிங்க, நீதி அமைச்சரும் ஸ்ரீலங்கா முஸ்லிம் காங்கிரஸின் தலைவருமான ரவூப் ஹக்கீமின் இணைப்பு செயலாளர் ரஹ்மத் மன்சூர் மற்றும் முப்படையை சேர்ந்த உயர் அதிகாரிகள் என பலர் அண்மையில் விஜமொன்றை மேற்கொண்டு பார்வையிட்டனர்.

2013 ஆம் ஆண்டு நடைபெறவுள்ள தேசத்திற்கு மகுடம் கண்காட்சி கிழக்கு மாகாணத்தின் அம்பாறை, மட்டக்களப்பு, திருகோணமலை மற்றும் பொலன்னறுவை ஆகிய மாவட்டங்களில்; நடைபெறவுள்ளமை குறிப்பிடத்தக்கது.