கல்முனை வடக்கு ஆதார வைத்தியசாலையின் தேவைகளை பூர்த்தி செய்து தருவதாக நாடாளுமன்ற உறுப்பினர் உறுதி

(ஹனீக் அஹமட்)

கல்முனை வடக்கு ஆதார வைத்தியசாலைக்கு நேற்று சனிக்கிழமை விஜயமொன்றினை மேற்கொண்ட அம்பாறை மாவட்ட நாடாளுமன்ற உறுப்பினர் பி. பியசேன, அங்குள்ள குறைபாடுகளைப் பார்வையிட்டதோடு, வைத்தியசாலைக்கான அவசிய தேவைகள் சிலவற்றினை உடனடியாக பூர்த்தி செய்து தருவதாகவும் உறுதியளித்தார்.

வைத்தியசாலையின் வைத்திய அத்தியட்சகர் எம்.எஸ்.எம். ஜாபிர், உத்தியோகத்தர்கள் மற்றும் வைத்தியசாலை அபிவிருத்திக் குழுவினர் ஆகியோர் விடுத்த வேண்டுகோளுக்கமைவாக நாடாளுமன்ற உறுப்பினர் வைத்தியசாலைக்கு விஜயம் செய்திருந்தார்.

இதன்போது, சத்திர சிகிச்சை பிரிவு, வைத்தியர்கள் விடுதி, வெளி நோயாளர் பிரிவு உள்ளிட்ட பகுதிகளைச் பார்வையிட்ட நாடாளுமன்ற உறுப்பினர் - அங்கு நிலவும் குறைபாடுகளை இந்த வருடத்துக்குள் நிறைவேற்றித் தருவதோடு, நோயாளர் விடுதிக்குத் தேவையான படுக்கை மெத்தை, மட்டும் படுக்கை விரிப்பு உள்ளடங்கலானவற்றை உடனடியாக வழங்குவதாகவும் உறுதியளித்தார்.

இதன்போது, வைத்தியசாலையில் இடம்பெற்ற நிகழ்வொன்றிலும் நாடாளுமன்ற உறுப்பினர் கலந்து கொண்டார். நாடாளுமன்ற உறுப்பினரின் இந்த வருகையின் போது, அத்தியட்சகர் எம்.எஸ்.எம். ஜாபிர், வைத்தியசாலை உத்தியோகத்தர்கள், ஊழியர்கள், வைத்தியசாலை அபிவிருத்திக் குழு அங்கத்தவர்கள் மற்றும் சமூகப் பிரதிநிதிகள் என பலர் பிரசன்னமாகியிருந்தனர்.