மானிய உரத்துக்கான விண்ணப்பங்களை சமர்பிக்குமாறு பணிப்பு

ஐ.ஏ.ஸிறாஜ்

சிறுபோக நெற்செய்கைக்குத் தேவையான, மானிய உரம் தேவைப்படுவோர், விதைப்பு நடவடிக்கை இடம்பெறுவதற்கு, இரண்டு வாரங்களுக்கு முன்னதாக, தமது விண்ணப்பங்களை, கமநலசேவை நிலையங்களில் சமர்ப்பிக்க வேண்டுமென உத்தரவு பிறப்பிக்கப்பட்டுள்ளது.   

கமநல அபிவிருத்தி உதவி ஆணையாளர்களுக்கு, கமநல அபிவிருத்தி ஆணையாளர் நாயகம் - அண்மையில் அனுப்பி வைத்த சுற்று நிருபத்தினூடாக, மேற்படி உத்தரவு பிறப்பிக்கப்பட்டுள்ளது.

இதேவேளை, விதைப்புத் திகதிக்கு முன்னதாக – தமக்குத் தேவையான மானிய உரத்துக்குரிய பணத் தொகையை, காணி உரிமையாளர்கள் செலுத்தி முடிக்க வேண்டுமெனவும் தெரிவிக்கப்படுகிறது.

ஓர் அந்தர் உரத்துக்கான மானியத் தொகையாக 350 ரூபாவும், அதனுடன் காப்புறுதித் தொகையாக 150 ரூபாவும் செலுத்த வேண்டுமென, கமநலசேவை நிலையத்தினர் தெரிவிக்கின்றனர்.

இதற்;கிணங்க, உச்சகட்டமாக 5 ஏக்கர் காணிகளுக்கு மானிய விலை அடிப்படையில் உரம் வழங்கப்படும்.

ஒரு ஏக்கர் நெற் செய்கைக் காணிக்கு 86 கிலோகிராம் யூரியா, 20 கிலோகிராம் ரி.எஸ்.பி, 22 கிலோகிராம் எம்.ஓ.பி எனும் அடைப்படையில் - கடந்த முறை, மானிய உரம் வழங்கப்பட்டமை குறிப்பிடத்தக்கது.