கிழக்கு மாகாணத்தில் 600 கிலோமீற்றர்; வரை கார்ப்பட் வீதிகளாக புனரமைக்க நடவடிக்கை

-ரீ.கே.றஹ்மத்துல்லா

ஆசிய அபிவிருத்தி வங்கியின் நிதியுதவியுடன் கிழக்கு மாகாணத்தில் 600 கிலோமீற்றர்; வரை கார்ப்பட் வீதிகளாக புனரமைப்பதற்கு நடவடிக்கை எடுக்கப்பட்டுள்ளது.

இது தொடர்பாக கிழக்கு மாகாண முதலமைச்சரின்; காரியாலயத்தில் திங்கட்கிழமை (09) நடைபெற்ற கூட்டத்திலேயே இந்தத் தீர்மானம் எடுக்கப்பட்டுள்ளது.  

கிழக்கு மாகாண முதலமைச்சின் கீழுள்ள உள்ளூராட்சி சபைகள் மற்றும் கிழக்கு மாகாண வீதி அபிவிருத்தித் திணைக்களத்தின் ஊடாகவே இந்த நடவடிக்கை முன்னெடுக்கப்படவுள்ளது.

அந்த வகையில், கிழக்கு மாகாண வீதி அபிவிருத்தித் திணைக்களத்தின் ஊடாக 200 கிலோமீற்றர் வீதியும் கிழக்கு மாகாண முதலமைச்சின் கீழுள்ள உள்ளூராட்சி சபைகள் ஊடாக 400 கிலோமீற்றர் வீதியும் கார்ப்பட் இடப்படவுள்ளன.

கிழக்கு மாகாண முதலமைச்சின் கீழுள்ள உள்ளூராட்சி சபைகள் ஊடாக அம்பாறை மாவட்டத்தில் 175 கிலோமீற்றர் வீதியும் மட்டக்களப்பு மாவட்டத்தில் 125 கிலோமீற்றர் வீதியும் திருகோணமலை மாவட்டத்தில் 100 கிலோமீற்றர் வீதியும் கார்ப்பட் இடப்படவுள்ளன.