பூகோள ரீதியில் நாளொன்றுக்கான அதிகபட்ச கொவிட்-19 தொற்றுக்கள் இந்தியாவில் பதிவு

கொவிட்-19 தொற்றில் தனித்த நாளொன்றுக்கான அதிகபட்ச கொவிட்-19 தொற்று உயர்ச்சியை இந்தியா இன்று பதிவுசெய்துள்ளது.

ஐக்கிய அமெரிக்காவானது கடந்த மாதம் 16ஆம் திகதி பதிவு செய்த 77,299 என்ற எண்ணிக்கையை இந்தியாவின் 78,761 என்ற எண்ணிக்கை விஞ்சியுள்ளது.

அந்தவகையில், இந்தியாவில் கொவிட்-19 தொற்றுக்குள்ளானோரின் எண்ணிக்கையானது 3,542,733ஆகக் காணப்படுவதுடன், கொவிட்-19-ஆல் உயிரிழந்தோரின் எண்ணிக்கையானது 948ஆல் உயர்ந்து 63,498-ஆகக் காணப்படுகிறது.

ஐக்கிய அமெரிக்காவில் இலங்கை நேரப்படி இன்று காலை 9.25 மணி வரையில் கொவிட்-19 தொற்றுக்குள்ளானோரின் எண்ணிக்கையானது 5,977,624ஆகக் காணப்படுவதுடன், 182,772 பேர் கொவிட்-19-ஆல் உயிரிழந்துள்ளனர்.

பிரேஸிலானது கடந்த 24 மணித்தியாலங்களில் 758 கொவிட்-19 உயிரிழப்புகளையும், 41,350 புதிய கொவிட்-19 தொற்றுக்களையும் பதிவுசெய்துள்ளதாக அந்நாட்டு சுகாதாரமைச்சு நேற்றுத் தெரிவித்துள்ள நிலையில் அங்கு கொவிட்-19-ஆல் 120,262 உயிரிழப்புகள் ஏற்பட்டுள்ளதுடன், 3,846,153 பேர் கொவிட்-19 தொற்றுக்குள்ளாகியுள்ளனர்.

அந்தவகையில், உலகளாவிய ரீதியில் 25 மில்லியனுக்கும் அதிகமானோர் கொவிட்-19 தொற்றுக்குள்ளாகியுள்ளதுடன், 841,000க்கும் அதிகமானோர் கொவிட்-19-ஆல் உயிரிழந்துள்ளனர்.