மேசைப்பந்தாட்டத்தில் தெல்லிப்பளை யூனியன் கல்லூரிக்கு சம்பியன்

(கிரிசன்,ரி-விவேகராசா) 

வடமாகாண கல்வித் திணைக்களத்தின் ஏற்பாட்டில் வடமாகாண மாவட்டப் பாடசாலை அணிகளுக்கிடையே நடைபெற்ற 19 வயதிற்குட்பட்டவர்களுக்கான பெண்களுக்கான மேசைப்பந்தாட்டப் போட்டியில் தெல்லிப்பளை யூனியன் கல்லூரி வடமாகாண சம்பியனாக தெரிவு செய்யப்பட்டது.

வவுனியா நகரசபை உள்ளக விளையாட்டு மைதானத்தில் நடைபெற்ற இறுதி ஆட்டத்தில் தெல்லிப்பளை யூனியன் கல்லூரியும் யாழ்ப்பாணம் இந்து மகளிர் கல்லூரியும் மோதிக்கொண்டன.

போட்டி ஆரம்பமாகி நிறைவடையும்  வரை இரு அணிகளும் கடுமையாக மோதியபோதிலும், ஆட்ட நிறைவில் தெல்லிப்பளை யூனியன் கல்லூரி வெற்றி பெற்று வடமாகாண சம்பியனாக தெரிவானது.

முதலாமிடத்தை தெல்லிப்பளை யூனியன் கல்லூரியும் இரண்டாமிடத்தை யாழ்ப்பாணம் இந்து மகளிர் கல்லூரியும் மூன்றாமிடத்தை யாழ்ப்பாணம் சுண்டுக்குளி மகளிர் கல்லூரியும் பெற்றுக்கொண்டன.

இந்த அணிகள் தேசிய மட்டத்தில் அகில இலங்கை ரீதியாக நடைபெறவுள்ள போட்டிகளில் விளையாட தகுதி பெற்றுள்ளன.

இதேவேளை, 19 வயதிற்குட்பட்டவர்களுக்கான ஆண்களுக்கான மேசைப்பந்தாட்டப் போட்டியில் யாழ் மத்திய கல்லூரி முதலாமிடத்தையும் வவுனியா சுந்தரபுரம் - அ.த.க பாடசாலை இரண்டாமிடத்தையும்  மன்னார் சென் ஆன்ஸ் மகாவித்தியாலயம் மூன்றாமிடத்தையும் பெற்றுக்கொண்டது.