சோபர் பெஸ்டிவல் : பி.எஸ்.சீ கழகம் சம்பியன்

Super User / 2014 ஓகஸ்ட் 18 , மு.ப. 05:51 - 0 - {{hitsCtrl.values.hits}}

-ரீ.கே.றஹ்மத்துல்லா

அட்டாளைச்சேனை சோபர் விளையாட்டுக் கழகம் நடத்திய சோபர் பெஸ்டிவல்-2014 வெற்றிக்கிண்ணத்துக்கானகான கிரிக்கெட் சுற்றுப் போட்டியில் அக்கரைப்பற்று பி.எஸ்.சீ. விளையாட்டுக் கழகம் சம்பியனானது.

கடந்த ஒரு வாரகாலமாக அம்பாறை மாவட்டத்தின் 40 முன்னணிக் கழகங்கள் பங்கு பற்றிய 05 பந்துப்பரிமாற்றங்களுக்கு மட்டுப்படுத்தப்பட்ட அணிக்கு 07 பேர் கொண்ட மென் பந்து கிரிக்கெட் சுற்றுப் போட்டியின் இறுதிப் போட்டிக்கு அக்கரைப்பற்று ஹாட் அன்ட் சொப்ட் அணியும், அக்கரைப்பற்று பி.எஸ்.சீ. அணியும் மோதிக் கொண்டன.

அட்டாளைச்சேனை அஸ்ரப் பொது விளையாட்டு மைதானத்தில் ஞாயிற்றுக்கிழமை (17) இடம்பெற்ற இறுதிப் போட்டிக்கான நாணயச் சுழற்சியில் வெற்றி பெற்ற பி.எஸ்.சீ. அணியினர் முதலில் களத்தடுப்பை தெரிவு செய்தனர்.

இதற்கமைய முதலில் துடுப்பெடுத்தாடிய ஹாட் அன்ட் சொப்ட் அணியினர் நிர்னகிக்கப்பட்ட 05 பந்துப்பரிமாற்றங்களில் 02 இலக்குகளை இழந்து 44 ஓட்டங்களைப் பெற்றனர்.

பதிலுக்கு களமிறங்கிய பி.எஸ்.சீ. அணியினர் 4.3 பந்துப்பரிமாற்றங்களுக்கு 02 இலக்குகளை மாத்திரம் இழந்து 46 ஓட்டங்களைப் பெற்று சோபர் பெஸ்டிவல் 2014 வெற்றிக் கிண்ணத்தையும், ரூபா 10.000 பணப்பரிசிலையும் வெற்றிகொண்டனர்.

இப் போட்டியில் எம்.சாஜீத் 8 பந்துகளுக்கு முகம்கொடுத்து 03 ஆறு ஓட்டங்கள் 01 நான்கு ஓட்டங்கள் அடங்கலாக 24 ஓட்டங்களை குவித்து அணியின் வெற்றிப் பாதைக்கு கொண்டு சென்றார்.

இரண்டாமிடத்தைப் பெற்ற ஹார்ட் அன்ட் சொப்ட் அணியினருக்கு 7,000 ரூபாய் பணப்பரிசிலும் 02ஆம் இடத்துக்கான கிண்ணமும் அதிதிகளினால் வழங்கி வைக்கப்பட்டன.

இச்சுற்றுப் போட்டியின் தொடர் ஆட்டநாயகனாக பி.எஸ்.சீ. கழகத்தைச் சேர்ந்த ஜாபீர்காண் தெரிவு செய்யப்பட்டதுடன், இறுதிப் போட்டியின் ஆட்ட நாயகனாக அதே கழத்தைச் சேர்ந்த எம்.சாஜீத் தெரிவு செய்யப்பட்டார்.

சோபர் விளையாட்டுக் கழகத்தின் உப தலைவர் ஏ.எஸ்.எம்.உவைஸ் தலைமையில் இடம்பெற்ற இந்த நிகழ்வில் பிரதம அதிதியாக கிழக்கு மாகாண வீதி அபிவிருத்தி, நீர்ப்பாசன அமைச்சர் எம்.எஸ்.உதுமாலெப்பையும், கௌரவ அதிதியாக கிழக்கு மாகாண சபை உறுப்பினர் ஏ.எல்.எம்.நஸீர் ஆகியோருடன் பிரதேச விளையாட்டு உத்தியோகத்தர் எஸ்.எல்.தாஜூதீன், மாவட்ட இளைஞர் சேவை அதிகாரி யூ.எம்.மஜீட் உள்ளிட்ட பலரும் கலந்து கொண்டனர்.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .