இஸ்ரேல்-ஈரான் மோதலில் 2 இலங்கையர்கள் காயம்

இஸ்ரேலுக்கும் ஈரானுக்கும் இடையில் நடந்து வரும் மோதல் காரணமாக, இஸ்ரேலில் இரண்டு இலங்கையர்கள் காயமடைந்துள்ளதாக இஸ்ரேலுக்கான இலங்கை தூதர் நிமல் பண்டார தெரிவித்தார்.

இஸ்ரேலில் உள்ள பேட் யாம் பகுதியில் சனிக்கிழமை ஏவுகணைத் தாக்குதலில் இலங்கைப் பெண் ஒருவர் தோளில் காயமடைந்ததாக தூதர் நிமல் பண்டாரா ஃபேஸ்புக்கில் ஒரு பதிவில் தெரிவித்தார். 

"காயமடைந்த பெண் மருத்துவமனையில் சிகிச்சை பெற்று, பின்னர் இலங்கை செவிலியரின் பராமரிப்பில் மேலதிக சிகிச்சைக்காக இலங்கை தூதரகத்திற்கு மாற்றப்பட்டார்," என்று அவர் கூறினார். 

ஞாயிற்றுக்கிழமை பினெய் பிராக் பகுதியில் ஈரானிய ஏவுகணைத் தாக்குதலில் இலங்கை கட்டுமானத் தொழிலாளி ஒருவரின் காலில் காயம் ஏற்பட்டதாக தூதர் நிமல் பண்டாரா மேலும் தெரிவித்தார். 

"அவருக்கு தேவையான சிகிச்சையை வழங்க ஏற்பாடுகள் செய்யப்பட்டு வருகின்றன," என்று அவர் கூறினார். 

கள நிலைமை குறித்து மேலும் விவரங்களை வழங்கிய தூதர் நிமல் பண்டார, அவசர பயணத் தேவைகள் உள்ள இலங்கையர்கள் ஜோர்டானில் உள்ள அம்மான் விமான நிலையம் அல்லது எகிப்தின் கெய்ரோ விமான நிலையம் வழியாக தரை வழியாக இஸ்ரேலுக்குள் நுழையவும் வெளியேறவும் அனுமதிக்கப்படுவார்கள் என்று கூறினார்.

டெல் அவிவின் பென் குரியன் விமான நிலையம் சர்வதேச விமானங்களுக்கு மூடப்பட்டதால் தற்போது இஸ்ரேலுக்குள் நுழைய முடியாத நபர்கள் ஜோர்தான் மற்றும் எகிப்து வழியாக பயண ஏற்பாடுகளைச் செய்யலாம் என்று இஸ்ரேலிய வெளியுறவு அமைச்சர் கிதியோன் சார் அறிவித்துள்ளதாக அவர் கூறினார்.

"இஸ்ரேலில் உள்ள தூதர்கள் மற்றும் இராஜதந்திரிகளுடனான ஒரு கலந்துரையாடலில் போது, ​​பென் குரியன் விமான நிலையத்தை மீண்டும் திறப்பதற்கான குறிப்பிட்ட திகதியை தன்னால் உறுதிப்படுத்த முடியவில்லை என்று அமைச்சர் சார் கூறினார்.

இருப்பினும், அவசர பயணத் தேவைகள் உள்ளவர்கள் ஜோர்டானில் உள்ள அம்மான் விமான நிலையம் அல்லது எகிப்தில் உள்ள கெய்ரோ விமான நிலையம் வழியாக தரை வழியாக இஸ்ரேலுக்குள் நுழைந்து வெளியேறலாம் என்று அவர் வலியுறுத்தினார்," என்று அவர் கூறினார். 

இலங்கைக்கும் இஸ்ரேலுக்கும் இடையில் பயணிக்க விரும்பும் பயணிகள் அந்தந்த நாடுகளிலிருந்து குறுகிய கால விசாக்களைப் பெற்று, ஈலாட் நகருக்கு அருகில் உள்ளவை உட்பட, நில எல்லைக் கடவைகள் வழியாக இஸ்ரேலுக்குள் நுழையலாம் என்று தூதர் நிமல் பண்டாரா கூறினார்.