கேணியில் தவறி வீழ்ந்து மாணவிகள் இருவர் உயிரிழப்பு

சண்முகம் தவசீலன்

முள்ளியவளை வித்தியானந்தா கல்லூரியில் தரம் 10 இல் கல்வி கற்கின்ற  மூன்று மாணவிகள்  ஞாயிற்றுக்கிழமை (01) மதியம் ஒரு மணிக்கு முல்லைத்தீவு மாவட்டத்தில் முல்லைத்தீவு பொலிஸ் பிரிவுக்குட்பட்ட குமுழமுனை கொட்டுக்கிணற்று  பிள்ளையார் ஆலய கேணிக்கு சென்றுள்ளனர்.

மூவரும் கேணியில் இருந்தபோது இருவர் நீரில் இறங்கி இருக்க மற்றவர் புகைப்படம் எடுத்துள்ளார்.

திடீரென இருவரும் நீரில் மூழ்கிய நிலையில் மற்றைய யுவதி அவர்களை காப்பாற்ற முயன்று அது பயனற்றுப் போக குறித்த யுவதி அயலவர்களை அழைத்து  அவர்களை மீட்டு முல்லைத்தீவு மாவட்ட வைத்தியசாலையில் அனுமதித்தபோதும் அவர்கள் ஏற்கனவே உயிரிழந்துள்ளனர்.

முள்ளியவளை வித்தியானந்தா கல்லூரியில்  தரம் பத்தில் கல்வி கற்கின்ற 15 வயதான  ச.ரஸ்மிலா மற்றும் ர.கிருசிகா ஆகிய இரு மாணவிகளே  இவ்வாறு உயிரிழந்துள்ளனர்.

உடலம் முல்லைத்தீவு மாவட்ட வைத்தியசாலையில் வைக்கப்பட்டுள்ளது மேலதிக விசாரணைகளை முல்லைத்தீவு பொலிஸார் மேற்கொண்டு வருகின்றனர்.. (a)