’ ​கைதிகளுக்கு சொகுசு அறைகளை வழங்க சம்பாயோ பணம் அறவிட்டுள்ளார்’

நீர்கொழும்பு சிறைச்சாலையின் முன்னாள் அதிகாரி அநுருத்த சம்பாயோவால் கைதிகளுக்கு, சுகபோக அறைகளை  சிறைக் கூடங்களில் ஒதுக்குவதற்காக, 10,000 ரூபாயிலிருந்து 2 இலட்சம் ரூபாய் வரை பணம் அறவிடப்பட்டுள்ளதாக அரசாங்கத்தின் மேலதிக சொலிஸிட்டர் நாயகம் திலீப பீரிஸ் நீர்கொழும்பு நீதவான் நீதிமன்றில் அறிவித்துள்ளார்.

கைது செய்யப்பட்டுள்ள சிறைச்சாலை முன்னாள் அதிகாரி அநுருத்த சம்பாயோ உள்ளிட்ட நால்வர், கடந்த வெள்ளிக்கிழமை நீதவான் நீதிமன்றில் ஆஜர்படுத்தப்பட்ட போதே, சொலிஸிட்டர் நாயகம்  மேற்கண்டவாறு தெரிவித்துள்ளார்.

அத்துடன் நீர்கொழும்பு சிறைச்சாலையின் சில கூடங்கள் ஹோட்டல் அறைகள் போன்று வடிவமைக்கப்பட்டுள்ளதாகவும் அவர் நீதிமன்றில் சுட்டிக்காட்டியுள்ளார்.

இவ்வாறு ஒதுக்கப்பட்டுள்ள இந்த அறைகள், போதைப் பொருள் உள்ளிட்ட ஏனைய குற்றச்செயல்களில் ஈடுபட்டு, சிறைத்தண்டனை விதிக்கப்பட்டவர்களுக்காக ஒதுக்கப்பட்டுள்ளதாகவும் இது தொடர்பான கொடுக்கல் வாங்கல்கள் சிறைச்சாலையின் சிற்றுண்டிச்சாலையில்  இடம்பெறுவதாகவும், இந்த சம்பவம் தொடர்பில் குற்றப்புலனாய்வு பிரவினர் முன்னெடுத்து வரும் விசாரணைகள் மூலம் தெரியவந்துள்ளதாகவும் அரசாங்கத்தின் மேலதிக சொலிஸிட்டர் நாயகம் திலீப பீரிஸ் நீர்கொழும்பு நீதவான் நீதிமன்றில் அறிவித்துள்ளார்.