கோட்டாவுக்கு அழைப்பில்லை?

ஒன்றிணைந்த எதிர்க்கட்சியின் ​தொழிலாளர் தினம் பொரளை கெம்பல் மைதானத்தில் நடைபெறவுள்ளதாக அக்கட்சியின் நாடாளுமன்ற உறுப்பினர் டலஸ் அழகப்பெரும தெரிவித்துள்ளார்.

எதிர்க்கட்சி அலுவலகத்தில் இன்று(03) நடைபெற்ற ​ஊடகவியலாளர் சந்திப்பில் கலந்துகொண்டு கருத்துரைக்கும்போதே அவர் இதனைத் தெரிவித்தார்.

ஒன்றிணைந்த எதிர்க்கட்சியும், ஸ்ரீ லங்கா பொதுஜன பெரமுனவும் இணைந்து தொழிலாளர் தினத்தை கொண்டாட தீர்மானித்துள்ளது. இதன்படி ஒன்றிணைந்த எதிரணியின் தலைவர் நாடாளுமன்ற உறுப்பினர் தினேஸ் குணவர்தனவும், பொதுஜன பெரமுனவின் தலைவர் முன்னாள் அமைச்சர் பசில் ராஜபக்ஷவும் இது தொடர்பில் பேச்சுவார்த்தைகளில் ஈடுபட்டிருந்ததாகவும் தெரிவித்தார்.

அதிக வெப்பமான வானிலை தொடருமாக இருந்தால், தொழிலாளர் தினத்தில் பேரணி நடத்தப்படாதெனவும் தெரிவித்தார்.

மேலும், இந்நிகழ்வில் கலந்துகொள்வதற்கு பாதுகாப்பு அமைச்சின் முன்னாள் செயலாளர் கோட்டாபய ராஜபக்ஷவுக்கு இதுவரையில் அழைப்பு விடுக்கப்படவில்லை. எதிர்க்கட்சி தலைவர் மஹிந்த ராஜபக்ஷ இதில் இந்நிகழ்வில் கலந்துகொள்வார்  எனவும் அவர் தெரிவித்தார்.