சிவனொளிபாத மலையின் பருவகாலம் டிசெ. 22இல் ஆரம்பம்

செ.தி.பெருமாள்

சிவனொளிபாத மலையின் பருவகாலம், டிசெம்பர் மாதம் 22ஆம் திகதி ஆரம்பமாகி, வெசாக் தினத்துடன் நிறைவடையவுள்ளதென அறிவிக்கப்பட்டுள்ளது.

பருவகாலத்தில் யாத்திரை மேற்கொள்ளும் யாத்திரிகர்கள், சிவனொளிபாத மலையில் சுற்றாடலை மாசுபடுத்தாது நடந்துகொள்வது அவசியம் என்று, நுவரெலியா மாவட்ட செயலாளர் ரோஹன புஷ்பகுமார வேண்டுகோள் விடுத்துள்ளார்.

இது தொடர்பிலான கலந்துரையாடல், நல்லதண்ணி நகரின் பொதுச் சுகாதார அதிகாரிகளின் கேட்போர்கூடத்தில், நேற்று முன்தினம் இடம்பெற்றது.

இந்தக் கலந்துரையாடலில், பொதுச் சுகாதார அதிகாரிகள், நல்லதண்ணி பொலிஸார், தேசிய நீர்வழங்கல் வடிகாலமைப்பச் சபையின் அதிகாரிகள், மஸ்கெலியா பிரதேச சபை உறுப்பினர்கள் உட்படப் பலர் கலந்துகொண்டனர். இதில் கலந்துகொண்டு கருத்துரைக்கும்போதே, அவர் இவ்வாறு தெரிவித்தார்.

வழமைபோன்று இம்முறையும், சிவனொளிபாத மலை வளாகத்தில் பொலித்தீன் பாவனைக்குத் தடைவிதிக்கப்பட்டுள்ளதெனவும், எனவே, சுற்றுச்சூழலின் பாதுகாப்புத் தொடர்பில், யாத்திரிகர்கள் மிகுந்த அவதானத்துடன் செயற்பட வேண்டும் என்றும் அவர் அறிவுறுத்தினார்.