’தமிழர்களை அரசாங்கம் புறக்கணிக்கிறதா?’

(வி.சுகிர்தகுமார்) 

தமிழில் தேசிய கீதம் பாடமுடியாது என்பதும் தமிழர்களின் கழுத்தை நசுக்குவது என்பதும் ஒன்றென தெரிவித்த தமிழ்த் தேசியக் கூட்டமைப்பின் நாடாளுமன்ற உறுப்பினர் கவீந்திரன் கோடீஸ்வரன், தமிழர்களை அரசாங்கம் புறக்கணிக்கிறதா? எனவும் கேள்வி எழுப்பியுள்ளார்.

இதுத் தொடர்பில் மேலும் தெரிவித்த நாடாளுமன்ற உறுப்பினர், தமிழில் தேசிய கீதம் பாடமுடியாது எனும் செய்தி, தமிழ் மக்களிடையே கவலையையும் வேதனையையும் உருவாக்கியுள்ளது.

பாரம்பரியமொழி, செம்மொழி முதல்மொழி, மூத்தமொழி என பல சிறப்புக்களை தன்னகத்தே கொண்ட தமிழ் மொழியில் தேசிய கீதம் பாடக்கூடாது என்பதை ஒருபோதும் ஏற்றுக்கொள்ள முடியாது என்றார்.

மேலும் வடகிழக்கு தமிழர்களை ஜக்கிய தேசிய கட்சி கடந்த காலத்தில் ஏமாற்றியது என தெரிவித்த அவர், கல்முனை வடக்கு பிரதேச செயலகத்தை தரமுயர்த்த வேண்டும் என தற்போதைய அரசாங்கத்திற்கும் அழுத்தம் கொடுப்போம் என கூறினார்.

கடந்தக் காலத்தில் ஜக்கிய தேசிய கட்சிக்கு எவ்வாறு அழுத்தங்களைக் கொடுத்தோமோ அதேபோல, தற்போதைய அரசாங்கத்துக்கும் கல்முனை பிரதேச செயலக தரமுயர்வு தொடர்பில், அழுத்தம் கொடுப்போம் எனவும் தெரிவித்தார்.