பணியாட்தொகுதியினரால் 15 மணிநேரம் விமானம் தாமதம்

பணியாட்தொகுதியினர் தாமதமானதால், ஜேர்மன் பிராங்பேர்டிலிருந்து கட்டுநாயக்க சர்வதேச விமான நிலையத்தை நோக்கி பயணித்த, ஸ்ரீ லங்கன் விமான சேவைக்கு சொந்தமான விமானம் சுமார் 15 மணிநேரம் தாமதமாகியுள்ளது.

இந்த விமானம், அந்த விமான நிலையத்திலிருந்து நேற்று வெள்ளிக்கிழமை காலை புறப்பட்டிருக்க வேண்டும். எனினும், இன்று சனிக்கிழமை காலைவரையிலும் அந்த விமானம் பிராங்பேர்ட் விமான நிலையத்திலேயே தரித்து நின்றுள்ளது.
பணியாட்தொகுதியினர் மதுபோதையில் இருந்ததாக அறியமுடிகின்றது.

இதேவேளை, பிராங்பேர்ட் விமான நிலையம் இரவு வேளைகளில் மூடப்பட்டிருக்கும் என்பதனால், அந்த விமான நிலையம், இன்று சனிக்கிழமை திறக்கப்பட்டதன் பின்னரே கொழும்பை நோக்கி அந்த விமானம் புறப்பட்டது.

இதேவேளை, ஸ்ரீலங்கன் விமான நிறுவனம் விடுத்துள்ள அறிக்கையில், யு.எல் 545  என்ற விமானம், காலதாமதமானமைக்காக, பயணிகளுக்கு ஏற்பட்ட அசௌகரியங்களுக்கா வருத்தத்தை தெரிவித்துக்கொள்வதாக தெரிவிக்கப்பட்டுள்ளது.

தாமதம் ஏற்பட்ட காலத்துக்கு தேவையான வசதிகளை செய்துகொடுப்பதற்கு நடவடிக்கை எடுக்கப்படும் என்றும் ஐரோப்பிய சங்கத்தின் ஒழுங்குவிதிகளுக்கு அமைவாக பயணிகளுக்கு நட்டஈடு பெற்றுக்கொள்வதற்கு ஸ்ரீ லங்கன் விமான நிறுவனம் நடவடிக்கை எடுக்கும் என்றும் அவ்வறிக்கையில் தெரிவிக்கப்பட்டுள்ளது.