மூதூர் அங்காடி வியாபாரிகளுக்கு நிரந்தர கடைகள் வழங்க நடவடிக்கை

(முறாசில்)

மூதூர் பிரதான வீதி விஸ்தரிக்கப்பட்டதைத் தொடர்ந்து அப்பகுதியிலிருந்து வெளியேற்றப்பட்ட அங்காடி வியாபரிகளுக்கு நிரந்தரமாக கடைகளை அமைத்துக் கொள்வதற்கான காணியைப் பெற்றுக் கொடுக்கும் நடவடிக்கையில் திருகோணமலை மாவட்டத்துக்கான முன்னாள் நாடாளுமன்ற உறுப்பினரும் மூதூர் பிரதேச சபை தவிசாளருமான கே.எம்.தௌபீக் ஈடுபட்டுள்ளார்.

உள்ளூராட்சி மன்றங்கள் கலைக்கப்படவுள்ள இவ்விறுதி நேரத்தில்  தான் ஏலவே வியாபாரிகளுக்கு அளித்த வாக்குறுதியை நிறைவேற்றும் வகையிலேயே இத்தீவிர முயற்சியில் ஈடுபட்டுள்ளதாகக் கூறும் தவிசாளர் மூதூர் மத்திய பஸ்தரிப்பு நிலையத்திற்கு அண்மித்த பகுயில் குறித்த காணிச் சொந்தக்காரர்களின் ஒத்துழைப்போடு சட்டபூர்வமாகவே கடைகள் அமைப்பதற்கான காணியை 100 பேருக்கு வழங்குவதற்கு ஒழுங்கு செய்துள்ளதாக தெரிவித்தார்.

நீண்;ட காலமாக மூதூர் பிரதான வீதியில் அங்காடி வியாபாரத்தில் ஈடுபட்டுவந்த வியாபாரிகள் அண்மையில் வீதி விஸ்தரிப்பு மேற்கொள்வதற்காக வேண்டி வெளியேற்றப்பட்ட நிலையில் தமது வியாபாரத்தை மேற்கொள்வதில் பெரும் சிரமத்திற்குள்ளாகி இருந்தமை குறிப்பிடத்தக்கது.