திருமலை - மட்டு. பாலங்களின் நிர்மாணப்பணிகளை துரிதமாக பூர்த்தி செய்ய நடவடிக்கை

(கியாஸ் ஷாபி)

திருகோணமலையையும் மட்டக்களப்பையும் இணைக்கும் 5 பாலங்களின் நிர்மாணப்பணிகளை இந்த மாதம்  30ஆம் திகதிக்குள்  பூர்த்தி செய்து வீதி அபிவிருத்தி அதிகாரசபையிடம் ஒப்படைக்கப்படவுள்ளன.
 
திருகோணமலை -  மட்டக்களப்பு வீதிப் புனரமைப்பின் கீழ் 5 பாலங்களின்  நிர்மாணப்பணிகளும் 99 கிலோமீற்றர் நீளமான வீதிப் புனரமைப்பும் இடம்பெற்று வருகின்றன. இதற்காக 10,500 மில்லியன் ரூபா நிதியொதுக்கீடு செய்யப்பட்டுள்ளது.
 
உப்பாறு, கங்கை, இறால்குழி, வெருகல், காயங்கேணி ஆகிய பாலங்களே நிர்மாணிக்கப்பட்டு வருகின்றன. இவற்றில் இறால்குழி, வெருகல், காயங்கேணி ஆகிய 3 பாலங்களின் நிர்மாணப்பணிகள் பூர்த்தியடைந்துள்ளன. இந்த நிலையில் உப்பாறு, கங்கை ஆகிய பாலங்களின் நிர்மாணப்பணிகளும் வீதிப் புனரமைப்பும் துரிதகதியில் மேற்கொள்ளப்பட்டு வருகின்றன.
 
இந்த நிர்மாணப்பணிகள் நிறைவுற்றதும் திருகோணமலை - மட்டக்களப்புக்கான தற்போதைய பயணத்தில் 100 மீற்றர் தூரம் குறைவடையும். கிழக்கு மாகாணசபையின் சேவைகளைப் பெறுவதற்காக திருகோணமலைக்கு வரும் மட்டக்களப்பு, அம்பாறை மாவட்ட மக்கள் பெரிதும் நன்மையடைவர்.
 
மூதூர், தோப்பூர், வெருகல் பிரதேச மக்களும் தரைவழிப்பாதையூடாக  குறுகிய நேரத்தில் செல்ல இலகுவாக்கப்பட்டுள்ளது.