சம்பியன் லீக்: நேற்றைய போட்டிகள்

சம்பியன் லீக் கிரிக்கெட் தொடரில் நேற்று இடம்பெற்ற போட்டிகளில் ஹோபர்ட் கியுரிகன்ஸ், கிங்ஸ் லெவன் பஞ்சாப் அணிகள் வெற்றி பெற்றுள்ளன. ஹோபர்ட் கியுரிகன்ஸ் வெற்றி பெற்றதன் மூலம் அரை இறுதிப் போட்டிக்கு குழு B இல் இருந்து இரண்டாவது அணியாக தெரிவாகியுள்ளது. ஏற்கனவே கிங்ஸ் லெவன் பஞ்சாப் அணி அரை இறுதிப் போட்டிக்குத் தெரிவாகியுள்ள நிலையில் கேப் கோப்ராஸ், நொதேர்ன் நைட்ஸ், பார்படோஸ் ட்ரைடென்ட்ஸ் அணிகள் அரை இறுதி வாய்ப்பை இழந்துள்ளன. 

 

ஹோபர்ட் கியுரிகன்ஸ், பார்படோஸ் ட்ரைடென்ட்ஸ் அணிகளுக்கிடையில் நடைபெற்ற போட்டியில் ஹோபர்ட் கியுரிகன்ஸ் அணி 6 விக்கெட்களினால் வெற்றி பெற்றது. முதிலில் துடுப்பாடிய பார்படோஸ் ட்ரைடென்ட்ஸ் அணி 19.4 ஓவர்களில் சகல விக்கெட்களையும் இழந்து 113 ஓட்டங்களைப் பெற்றது. இதில் ஜொனதன் கார்ட்டர் 42 ஓட்டங்களைப் பெற்றார். பந்துவீச்சில் சேவியர்ன் டொஹார்ட்டி 4 விக்கெட்களைக் கைப்பற்றினார். பதிலுக்கு துடுப்பாடிய  ஹோபர்ட் கியுரிகன்ஸ் அணி 18.2 ஓவர்களில் 4 விக்கெட்களை இழந்து 118 ஓட்டங்களைப் பெற்றது. இதில் சொய்ப் மலிக் ஆட்டமிழக்காமல் 39 ஓட்டங்களைப் பெற்றார். அகீல் ஹொசீன் 2 விக்கெட்களை பந்துவீச்சில் கைப்பற்றினார்.

 

கிங்ஸ் லெவன் பஞ்சாப், கேப் கோப்ராஸ் அணிகளுக்கிடையில் நடைபெற்ற போட்டியில் கிங்ஸ் லெவன் பஞ்சாப் அணி 7 விக்கெட்களினால் வெற்றி பெற்றுள்ளது. இந்தப் போட்டியில் முதலில் துடுப்பாடிய கேப் கோப்ராஸ் அணி 18.3 ஓவர்களில் சகல விக்கெட்களையும் இழந்து 135 ஓட்டங்களைப் பெற்றுக் கொண்டது. இதில் ரிச்சர்ட் லெவி 42 ஓட்டங்களைப் பெற்றுக் கொண்டார். பந்துவீச்சில் அனுரீத் சிங், அக்ஸார் பட்டேல் ஆகியோர் தலா 3 விக்கெட்களைக் கைப்பற்றினர். பதிலுக்கு துடுப்பாடிய கிங்ஸ் லெவன் பஞ்சாப் அணி 18.1 ஓவர்களில் 3 விக்கெட்களை இழந்து 139 ஓட்டங்களைப் பெற்றுக் கொண்டது. இதில் ரிதிமன் சஹா ஆட்டமிழக்காமல் 42 ஓட்டங்களைப் பெற்றுக் கொண்டார். ரொபின் பீட்டர்சன் 2 விக்கெட்களைக் கைப்பற்றினார்.