மூன்றாவது சுற்றுடன் வெளியேறினார் நடப்புச் சம்பியன்

பிரித்தானியாவில் இடம்பெற்றுவரும் ஈஸ்ட்போர்ண் டென்னிஸ் தொடரின் மூன்றாவது சுற்றுடன் நடப்புச் சம்பியனான டென்மார்க்கின் கரோலின் வொஸ்னியாக்கி வெளியேற்றப்பட்டுள்ளார்.

நேற்று இடம்பெற்ற தனது மூன்றாவது சுற்றுப் போட்டியில் உலகின் 10ஆம் நிலை வீராங்கனையான அர்யானா சபலெங்காவை எதிர்கொண்ட கரோலின் வொஸ்னியாக்கி, 6-2, 4-6, 6-7 (5-7) என்ற செட் கணக்கில் தோல்வியடைந்தே தொடரிலிருந்து வெளியேற்றப்பட்டிருந்தார்.

இந்நிலையில், நேற்று இடம்பெற்ற தனது மூன்றாவது சுற்றுப் போட்டியில் பெல்ஜியத்தின் எலிஸே மேர்ட்டன்ஸை எதிர்கொண்ட உலகின் மூன்றாம் நிலை வீராங்கனையான கரோலினா பிளிஸ்கோவா, 6-1, 6-2 என்ற நேர் செட்களில் வென்று காலிறுதிப் போட்டிக்குத் தகுதிபெற்றார்.

இதேவேளை, நேற்று இடம்பெற்ற தனது மூன்றாவது சுற்றுப் போட்டியில் ஜேர்மனியின் அன்னா-லெனா ஃபிறைட்சாமை எதிர்கொண்ட உலகின் நான்காம் நிலை வீராங்கனையான நெதர்லாந்தின் கிகி பேர்ட்டன்ஸ், 6-3, 6-3 என்ற நேர் செட்களில் வென்று காலிறுதிப் போட்டிக்குத் தகுதிபெற்றார்.

இந்நிலையில், நேற்று  இடம்பெற்ற தனது மூன்றாவது சுற்றுப் போட்டியில் சுவீடனின் றெபெக்கா பீற்றர்ஸனை எதிர்கொண்ட ஜேர்மனியின் அங்கெலிக் கேர்பர், 7-6 (7-4), 6-0 என்ற நேர் செட்களில் வென்று காலிறுதிப் போட்டிக்குத் தகுதிபெற்றார்.

இதேவேளை, நேற்று  இடம்பெற்ற தனது மூன்றாவது சுற்றுப் போட்டியில் ஸ்லோவேனியாவின் பொலொனா ஹெர்கொக்கை எதிர்கொண்ட உலகின் ஏழாம்நிலை வீராங்கனையான சிமோனா ஹலெப் 6-1, 4-6, 6-3 என்ற செட் கணக்கில் வென்று காலிறுதிப் போட்டிக்குத் தகுதிபெற்றார்.