விம்பிள்டன் டென்னிஸ் தொடர்: வெளியேற்றப்பட்டார் முதல்நிலை வீராங்கனை

பிரித்தானியாவின் தலைநகர் இலண்டனில் இடம்பெற்றுவரும் விம்பிள்டன் டென்னிஸ் தொடரின் நான்காவது சுற்றுடன் உலகின் முதல்நிலை வீராங்கனையான அஷ்லெய் பார்ட்டி தொடரிலிருந்து வெளியேற்றப்பட்டுள்ளார்.

நேற்று இடம்பெற்ற போட்டியில் ஐக்கிய அமெரிக்காவின் அலிஸன் றிஸ்கேயை எதிர்கொண்ட அவுஸ்திரேலியாவின் அஷ்லெய் பார்ட்டி 6-3, 2-6, 3-6 என்ற செட் கணக்கில் தோல்வியடைந்து தொடரிலிருந்து வெளியேற்றப்பட்டார்.

இதேவேளை, தனது நான்காவது சுற்றுப் போட்டியில் சக செக் குடியரசின் கரோலினா முஷோவாவை எதிர்கொண்ட உலகின் மூன்றாம்நிலை வீராங்கனையான கரோலினா பிளிஸ்கோவா, 6-4, 5-7, 11-13 என்ற செட் கணக்கில் தோல்வியடைந்து தொடரிலிருந்து வெளியேறியிருந்தார்.

இந்நிலையில், தனது நான்காவது சுற்றுப் போட்டியில் பிரித்தானியாவின் ஜொஹன்னா கொன்டாவை எதிர்கொண்ட உலகின் ஆறாம்நிலை வீராங்கனையான பெட்ரா குவிற்றோவா, 6-4, 2-6, 4-6 என்ற செட் கணக்கில் தோல்வியடைந்து தொடரிலிருந்து வெளியேறியிருந்தார்.

இதேவேளை, தனது நான்காவது சுற்றுப் போட்டியில் ஐக்கிய அமெரிக்காவின் கோரி கெளஃப்பை எதிர்கொண்ட உலகின் ஏழாம்நிலை வீராங்கனையான றோமானியாவின் சிமோனா ஹலெப் 6-3, 6-3 என்ற நேர் செட்களில் வென்று காலிறுதிப் போட்டிக்கு முன்னேறினார்.

இந்நிலையில், தனது நான்காவது சுற்றுப் போட்டியில் குரோஷியாவின் பெட்ரா மார்டிச்சை எதிர்கொண்ட உலகின் எட்டாம்நிலை வீராங்கனையான உக்ரேனின் எலினா ஸ்விட்டோலினா, 6-4, 6-2 என்ற நேர் செட்களில் வென்று காலிறுதிப் போட்டிக்கு முன்னேறினார்.

இதேவேளை, தனது நான்காவது சுற்றுப் போட்டியில் ஸ்பெய்னின் கார்லா சுவாரஸ் நவரோவாவை எதிர்கொண்ட உலகின் 10ஆம் நிலை வீராங்கனையான ஐக்கிய அமெரிக்காவின் செரீனா வில்லியம்ஸ், 6-2, 6-2 என்ற நேர் செட்களில் வென்று காலிறுதிப் போட்டிக்குத் தகுதிபெற்றார்.

இந்நிலையில், தனது நான்காவது சுற்றுப் போட்டியில் பிரான்ஸின் உகோ ஹம்பேர்ட்டை எதிர்கொண்ட உலகின் முதல்நிலை வீரரும் நடப்புச் சம்பியனுமான நொவக் ஜோக்கோவிச், 6-3, 6-2, 6-3 என்ற நேர் செட்களில் வென்று காலிறுதிப் போட்டிக்கு முன்னேறினார்.

இதேவேளை, தனது நான்காவது சுற்றுப் போட்டியில் போர்த்துக்கல்லின் ஜோவா சூஸாவை எதிர்கொண்ட உலகின் இரண்டாம்நிலை வீரரான ஸ்பெய்னின் ரபேல் நடால், 6-2, 6-2, 6-2 என்ற நேர் செட்களில் வென்று காலிறுதிப் போட்டிக்குத் தகுதிபெற்றார்.

இந்நிலையில், தனது நான்காவது சுற்றுப் போட்டியில் இத்தாலியின் மட்டியோ பெரெட்டினியை எதிர்கொண்ட உலகின் மூன்றாம்நிலை வீரரான சுவிற்ஸர்லாந்தின் ரொஜர் பெடரர், 6-1, 6-2, 6-2 என்ற நேர் செட்களில் வென்று காலிறுதிப் போட்டிக்குத் தகுதிபெற்றார்.

இதேவேளை, தனது நான்காவது சுற்றுப் போட்டியில் கஸக்ஸ்தானின் மிக்கைல் குகுஷ்கின்னை எதிர்கொண்ட உலகின் ஏழாம்நிலை வீரரான ஜப்பானின் கீ நிஷிகோரி, 6-3, 3-6, 6-3, 6-4 என்ற செட் கணக்கில் வென்று காலிறுதிப் போட்டிக்கு முன்னேறினார்.