வேட்பாளர்களைத் தெரிவுசெய்ய த.ஐ.சு.மு நடவடிக்கை

-எம்.எஸ்.எம்.நூர்தீன்

கருணா அம்மான் தலைமையிலான தமிழர் ஐக்கிய சுதந்திர முன்னணியானது, எதிர்வரும் மாகாண சபை மற்றும் உள்ளூராட்சிமன்றத் தேர்தல்களில் போட்டியிடுவதற்காக சிறந்த வேட்பாளர்களைத் தெரிவு செய்யவுள்ளது என அம்முன்னணியின் செயலாளர் வி.கமலதாஸ் தெரிவித்தார்.

தமிழர் ஐக்கிய சுதந்திர முன்னணியின் மத்திய குழுக் கூட்டம், மட்டக்களப்பிலுள்ள அதன் அலுவலகத்தில் ஞாயிற்றுக்கிழமை (7)  நடைபெற்றபோதே, இந்தத் தீர்மானம் எடுக்கப்பட்டுள்ளது எனவும் அவர் கூறினார்.

முன்னாள் பிரதி அமைச்சரும் தமிழர் ஐக்கிய சுதந்திர முன்னணியின் தலைவருமான விநாயகமூர்த்தி முரளிதரன் (கருணா அம்மான்) தலைமையில் மத்திய குழுக் கூட்டம் நடைபெற்றது.

எதிர்வரும் மாகாண சபை மற்றும் உள்ளுராட்சிமன்றத் தேர்தல்களில் தனித்து அல்லது வேறு கட்சிகளுடன் இணைந்து  போட்டியிடுவதா என்பது பற்றியும் இக்கூட்டத்தில் ஆராயப்பட்டதுடன், அது தொடர்பாக மேலும்; ஆலோசிக்கவுள்ளதாகவும் அவர் கூறினார்.

மக்களுக்கு சிறந்த சேவையாற்றுபவர்கள்,  மக்களுடன் நெருங்கிப் பழகுகின்றவர்கள், கல்வியாளர்கள் போன்றோரை வேட்பாளர்களாத் தெரிவு செய்வதற்கு இக்கூட்டத்தில்; தீர்மானிக்கப்பட்டது எனவும் அவர் கூறினார்.  

மேலும், கல்குடாவில் அமைக்கப்படும் எத்தனோல் மதுபான உற்பத்திச்சாலை விவகாரம் தொடர்பாகவும் இக்கூட்டத்தில் ஆராயப்பட்டது எனவும் அவர் கூறினார்.