162 கி.கி கோழி இறைச்சி பறிமுதல்; ‌‌ரூ.20 ஆயிரம் அபராதம்

மட்டக்களப்பு - காத்தான்குடியில் இருந்து பதியத்தலாவை பிரதேசத்துக்கு, படி ரக வாகனத்தில், சுகாதாரமற்ற முறையில் கொண்டு செல்லப்பட்ட 162 கிலோகிராம் கோழி இறைச்சி, பொதுச் சுகாதாரப் பரிசோதகர்களால் பறிமுதல் செய்யப்பட்டுள்ளது.

இவ்வாறு பறிமுதல் செய்யப்பட்ட இறைச்சியை உடன் அழிக்குமாறும்,   இறைச்சியை சுகாதாரமற்ற முறையில் எடுத்துச் சென்ற நபரை 20 ஆயிரம் ரூபாய் அபராதம் செலுத்துமாறும், மட்டக்களப்பு நீதவான் றிஸ்வான், நேற்று (12) உத்தரவிட்டார்.

புல்லுமலை பொதுச் சுகாதாரப் பரிசோதகர் பொன்னம்பலம் மனேகரன், கரடியனாறு பொதுச் சுகாதாரப் பரிசோதகர் த.ரவிவர்மா ஆகியோர், கொடுவாமடு பிரதேசத்தில் வீதியால் செல்லும் வாகனங்களை, நேற்று முன்தினம் நிறுத்தி, பரிசோதனையில் ஈடுபட்டுக் கொண்டிருந்தனர்.

இதன்போது, பதியத்தலாவை நோக்கிச் சென்ற குறித்த படி ரக வாகனத்தை நிறுத்தி சோதனை செய்தபோது, வாகனத்தில் புளி மூட்டைகளுடன், சுகாதாரமற்ற முறையில் 162 கிலோகிராம் கோழி இறைச்சிகளைக் கொண்டு செல்லப்பட்டதையடுத்து, அவ்வாகனத்தை ஓட்டி வந்தவரைக் கைதுசெய்து, மட்டக்களப்பு நீதவான் நீதிமன்றத்தில் ஆஜர்படுத்தினர்.