ஐ.தே.கவுக்கோ, பிரதமர் தலைமையிலான அரசாங்கத்துக்கோ ஆதரவளிப்பதில்லை

எந்தக் காரணம் கொண்டும் ஐக்கிய தேசியக் கட்சிக்கோ அல்லது பிரதமர் ரணில் விக்கிரமசிங்க தலைமையிலான அரசாங்கத்துக்கோ  ஆதரவளிப்பதில்லை எனத் தீர்மானித்துள்ளதாக, கலாநிதி எம்.எல்.ஏ.எம்.ஹிஸ்புல்லாஹ் தெரிவித்தார்.

அத்துடன், சமூக நலன் கருதியும் முஸ்லிம் மக்களுடைய பாதுகாப்புக் கருதியும் எதிர்க்கட்சி வரிசையில், ஸ்ரீ லங்கா சுதந்திரக் கட்சியுடன் தொடர்ந்தும் இருப்பதென முடிவு செய்துள்ளதாகவும் அவர் தெரிவித்தார்.

தனது நிலைப்பாடு குறித்து ஊடகங்களுக்குக் கருத்துத் தெரிவிக்கும் போதே, அவர் மேற்கண்டவாறு கூறினார்.

இதன் போது தொடர்ந்து கருத்துத் தெரிவித்த அவர், தான் பல்வேறுபட்ட தரப்பினருடன் கலந்துரையாடியதன் அடிப்படையிலும் சமூகத் தலைவர்கள், மார்க்கத் தலைவர்கள், அரசியல் தலைமைத்துவங்களுடன் தான் நடத்திய கலந்துரையாடலின் அடிப்படையிலும் மேற்கண்ட தீர்மானத்தை எடுத்துள்ளதாகத் தெரிவித்தார்.

எதிர்க்கட்சியில் இருந்தாலும் சமூகத்துக்கான தனது பணிகளையும் மக்களுக்கான பணிகளையும் தொடர்ந்து முன்னெடுப்பது எனத் தீர்மானித்துள்ளதாகவும் அவர் தெரிவித்தார்.

ஜனாதிபதி மைத்திரிபால சிறிசேனவின் தலைமையில் நேற்று  (19) மாலை இடம்பெற்ற ஸ்ரீ லங்கா சுதந்திரக் கட்சிக்குழுக் கூட்டத்திலே, தெளிவானதும் இறுதியானதுமான ஒரு தீர்மானம் எடுக்கப்பட்டுள்ளதாகவும் அவர் மேலும் தெரிவித்தார்.