கிழக்குப் பல்கலைக்கலைக்கழத்தில் காணாமல் போனோருக்கு நினைவுகூரல்

-பேரின்பராஜா சபேஷ்
 
1990ஆம் ஆண்டு யுத்த சூழ்நிலையின்போது, உயிர் அபாயம் கோரி கிழக்குப்
பல்கலைக்கழகத்தில் தஞ்சம் அடைந்திருந்தபோது, விசாரணைக்காக என்று கூறி இராணுவத்தினரால் அழைத்துச்செல்லப்பட்டு காணாமல் போனோரின் 26ஆவது வருட நினைவுதினம் இன்று திங்கட்கிழமை அனுஷ்டிக்கப்பட்டது.
 
இந்நிலையில், கொம்மாதுறை ஸ்ரீசித்தி விநாயகர் கோவிலில் காணாமல் போனோரின் உறவினர்கள் ஒன்றுகூடி விசேட பூஜையிலும் பிரார்த்தனையிலும் ஈடுபட்டனர்.
 
1990 ஆண்டு செப்டெம்பர் மாதம் 5ஆம் திகதி கிழக்குப் பல்கலைக்கழத்தில் தஞ்சம் அடைந்திருந்த 158 இளைஞர்களை குடும்ப உறவினர்களின் முன்னிலையில் விசாரணைக்காக என்று கூறி பஸ்களில் இராணுவத்தினர் அழைத்துச்சென்றுள்ளதாக தெரிவிக்கப்படுகின்றது.
 
இச்சம்பவம் தொடர்பில் மட்டக்களப்பு சமாதானக்குழு உட்பட பலரிடமும் முறைப்பாடு செய்திருந்தபோதிலும், இவர்களுக்கு என்ன நடந்தது என்று இதுவரையில் தெரியவில்லை எனவும் கூறப்படுகின்றது.