தீபாவளிப் பண்டிகையன்று பதுளையில் மதுபானசாலைகளுக்குப் பூட்டு

எம். செல்வராஜா

தீபாவளிப் பண்டிகையன்று, பதுளை மாவட்டத்திலுள்ள மதுபான விற்பனை நிலையங்களை மூடுமாறு, இலங்கை மதுவரித்திணைக்களத் தலைமையக பிரதி ஆணையாளர், பதுளை மாவட்ட அரசாங்க அதிபருக்கு, சுற்றுநிரூபமொன்று அனுப்பி வைத்துள்ளார்.

பதுளை மாவட்ட நாடாளுமன்ற உறுப்பினர் அ. அரவிந்தகுமார், இலங்கை மதுவரித் திணைக்கள ஆணையாளர் நாயகத்துக்கு அனுப்பியிருந்த கடிதத்துக்கு பதிலளிக்கும் வகையிலேயே, இந்தச் சுற்றுநிரூபம் அனுப்பி வைக்கப்பட்டுள்ளது.

அரவிந்தகுமார் அனுப்பியிருந்தக் கடிதத்தில், மக்கள் நலன் கருதி, தீபாவளி மதுபான விற்பனை நிலையங்களை மூடிவிட உத்தரவிடுமாறு குறிப்பிடப்பட்டிருந்தது.

மதுவரித் திணைக்கள ஆணையாளர் நாயகத்தின் சுற்றுநிரூபத்தில், மஹியங்கனை, ரிதிமாலியத்தை ஆகிய பிரதேச செயலகப் பிரிவுகளை தவிர்த்து, மாவட்டத்தின் ஏனைய பிரதேச செயலகப் பிரிவுகளின், மதுபான வகைகள் விற்பனை செய்யும் நிலையங்களை, தீபாவளிப் பண்டிகை தினத்தன்று மட்டும் மூடுவதற்கு அனுமதி வழங்கியுள்தாக தெரிவிக்கப்பட்டுள்ளது.