தேயிலைக் காணிகளின் கன்றுகள் நடுவதற்கு எதிர்ப்பு

ஆ.ரமேஸ்

இராகலை - டெல்மார் மேல்பிரிவு தோட்டத் தொழிலாளர்கள் நேற்று (14) காலை அடையாள பணி பகிஷ்கரிப்பில் ஈடுப்பட்டனர்.

தோட்ட நிர்வாகம் டெல்மார் மேல்பிரிவு தோட்டத்திற்குரிய தேயிலைக் காணிகளில் " யூக்கலிப்டஸ் "மரக்கன்றுகளை நடுவதற்கு எடுத்த முயற்சியினை கண்டித்தே தொழிலாளர்கள் பணி பகிஷ்கரிப்பில் ஈடுப்பட்டுள்ளனர்.

டெல்மார் தோட்டத்தை பிரவுஸ் கம்பனி பொறுப்பேற்றதன் பின்னர், பல ஹெக்டேயர் தேயிலைக் காணிகளில் தேயிலை மரங்களுக்கு இடையிலும், ஓரங்களிலும் " யூக்கலிப்டஸ் " மரக் கன்றுகளை நிர்வாகம் நாட்டி வருகிறது.

இந்த நிலையில், எதிர்காலத்தில் தேயிலைக்கு  பாரிய பாதிப்பு ஏற்படும் என சுட்டிக்காட்டும் தொழிலாளர்கள், தோட்ட நிர்வாகம்  " யூக்கலிப்டஸ் " மரங்கள் ஊடாக பாரிய இலாபத்தை அடைய திட்டமிட்டு தேயிலையை அழிக்க திட்டமிடுகிறது எனவும் தெரிவிக்கின்றனர்.

மேலும் தேயிலை நிலங்களில்   " யூக்கலிப்டஸ் " மரக்கன்றுகளை நடுவதால், தேயிலைக்கு நீர் பற்றாக்குறை ஏற்பட்டு பின் தேயிலை விளைச்சல் குறைந்து விடும்.இதனால் தொழிலாளர்கள் தொழிலை இழக்க நேரிடுவதுடன் தேயிலை மலைகள் காடாகும் எனவும் தெரிவிக்கின்றனர்.

உடப்புஸ்ஸலாவை எனிக் தோட்டத்தில் உற்பத்தி செய்யப்படும்  " யூக்கலிப்டஸ் " மரக்கன்றுகளை  டெல்மார் தோட்ட நிர்வாகம் கொண்டு வந்து நடுவதற்கு தொழிலாளர்கள் நிர்வாகத்தினரால் பணிக்கப்பட்டுள்ள நிலையில்,தோட்ட நிர்வாகத்தின் பணிப்பினை நிராகரித்து, கொண்டுவரப்பட்ட மரக்கன்றுகளை மீண்டும் வெளியில் எடுத்து செல்லும்படி வழியுறுத்தி பணி பகிஷ்கரிப்பில் ஈடுப்பட்டுள்ளதாக தொழிலாளர்கள் தெரிவித்தனர்.